سؤال متكرر : أعرف أنه بيحبنى أزاى ؟
السؤال دة بيتعاد عليا كتير أوى من البنات.
الأجابة بكل بساطة : عمرك ما هتعرفى لأن فى حوالى 3 أنواع من الرجاله فى الحب:
الأول : فى راجل ذكى أوى فى التعامل مع الأنثى
و هو شخصيته بتبقى لطيفة و بيعرف يقرأ أحتياجها و يشبعه ليها.
(فالتصرفات هتدل أنه بيحب) لكن هو ممكن ميكونش بيحب فعلاً هو شاطر بس فى التعامل.
الثانى :فى راجل تانى بيحب جداً لكن مبيعرفش يتعامل صح مع الأنثى و لا بيعرف يقرأ أحتياجاتها
و على طول محتاس فى التعامل و مش بيعرف يترجم مشاعره و لا كلام و لا أفعال.
(فالتصرفات هتدل هنا أنه مبيحبش) لكن هو فى الحقيقة بيموت فيها و نفسه يعبر عن دة بس مش عارف.
الثالث : فى راجل بيحب جداً و بيعرف يتعامل مع الأنثى و يقرأ أحتياجاتها
بس المفاجأة الأحساس دة وليد موقف و مع الوقت هينتهى.
يعنى أنا حبيت فى مرحلة ما بسبب موقف أو ظرف جمعنا و بعد فترة
(بينتهى الشعور) بعد أنتهاء آثار الموقف أو الشئ اللى بيجمعنا.
فالحب أو عدمه مشاعر مش بتتشاف بتترجم لأفعال و كلام
(فى ناس مبتعرفش تترجم الموجود و فى ناس بتعرف تترجم
بس مفيش شعور أو أحياناً يكون شعور مؤقت و هينتهى).
هتعرفى بيحبك و لالا أزاى ؟
مع الوقت و معرفة الشخص كويس و أنك تشوفى كل وشوشه و تعاملاته، غير كدة مفيش حاجة أكيده.
