-أزاى تتخلص من الأكتئاب (للناس الأيجابيين)
*عيش الأكتئاب (الغير مرضى) 
– نععععععم أعيش الأكتئاب !!!!!
* أه عيش الأكتئاب
*لأنك لو معشتش الأكتئاب هو اللى هيعيشك لأن المشاعر ربنا خلقها عشان نعبر عنها و تطلع و تخلص
لكن أحنا بنعمل حاجة لطيفة جداً نزعل نكبت جوانا و نقول أحنا كويسين أو نبقى تعبانين من جوانا و نبين أحنا سعداء
و دى مصيبة فى حد ذاتها لأننا بنكبت المشاعر اللى أصلاً مفروض تطلع و بتفضل موجودة و تتراكم و تتراكم و تتراكم
و نفضل نضحك و أحنا من جوانا بنموت بأسم الأيجابية أو بأسم القوة و دة أصلاً مصيبة هتسبب هشاشة لنفوسنا و قوة تحملنا.
-طيب نعمل أية يا نـــــــــــــــــــــــــــــــــــــــــــــــــور.
*عيط صوت ولول أندب حظك قول انا قرفان تعبان مكتئب صرخ طلع اللى جواك طلع الكبت اللى أنت كبته
بقالك سنين روح للشخص اللى بتحبه قوله انا كنت بحبك و طظ لو انت مبتحبنيش و روح قول لصاحبك انت جدع فى الموقف دة
قولى لصاحبتك أنتى كنتى جميلة فى فرح بنت خالتك السنة اللى فاتت، طلع الحلو و الوحش اللى جواك
أصل لو مطلعتهوش هيحصل عملية ركود للمشاعر ما هو مفيش مكان أصلاً لمشاعر جديدة حلوة أو حتى وحشة.
مش عارف تقول للى حواليك جيب ورقة و اكتب، مبتحبش تكتب جيب مسجل و افضل اتكلم وصوت و عيط،
مفيش مسجل كلم نفسك هتسمعك، بتحب المشاركة كلم صاحبك و طلع اللى جواك.
طلع كل الأفكار و الكلام و المشاعر و الأسئلة سواء كانت منطقية أو لا طلع اللى جواك و حس أد أية فى تقل أتشال من على قلبك.
لما بتكون مكتئب بتحس أن الدنيا سودا و الشغل بايظ و جوزك قرفك و باباكى مضطهدك و مامتك مفترية و صاحبك ندل
و الجناينى خاين و بتاع السوبر ماركت مبيحترمنيش طلع كل الافكار و المشاعر دى و عبر عنها بالشكل اللى يريحك المهم طلعها.
– و بعد ما أطلعها تفتكرى هنبسط كدة يا نـــــــور.
*طلعتها و عيشتها هترتاح طيب أمتى بقى تطلعها و مترتاحش؟؟؟؟
-أمتى؟؟؟؟؟
* بأنك تكون نكدى بطبعك و أنت كدة مش هتريح نفسك عمرك يا أنك ترجع تانى تكبت مشاعرك جواك و متعبرش عنها.
عبر عن مشاعرك بكلماتك بصوتك بجسمك بعقلك بقلبك .. عبر عن الحلو و الوحش .. عبر بكل حتة فى كيانك.
عير عن نفسك و أحترم مشاعرك و أكبر أشكال أحترام المشاعر أنك تعيشها.
جرعة نور – نور البكرى
