أى حاجة بنتفرج عليها من أفلام أو مسلسلات أو أغانى
بتأثر على تفكيرنا و زرع المعتقدات و الأولويات بالنسبة لنا.
بقالى فترة كبيرة بتفرج على أفلام و مسلسلات أجنبى.
لاحظت أن هما مركزين على فكرتين عايزين يزرعوها عند الناس بشكل غير مباشر.
الفكرة الأولى : (فكرة أيجابية)
و هى فكرة العيلة : خصوصاً المسلسلات بيركزوا على فكرة العيلة و الترابط و أن لازم نكون مع بعض
و نساعد بعض و أن العيلة ليها الأولوية.
حتى الكرتون بيركزوا على النقطة دى جداً.
و دة ذكاء منهم لأنهم أدركوا كويس جداً (آسرة ناجحة = مجتمع ناجح مترابط).
لأن أى مجتمع فاشل لو ركزنا على أفراده هنلاقيهم من آسرة مفككة
أو آسرة بتهدم فى أفرادها أكتر ما بتبنيهم.
الفكرة التانية : (فكرة سلبية)
و هى فكرة الشواذ : هنلاقى أفلامهم و مسلسلاتهم حالياً لازم تضمن ناس شواذ.
مش بس كدة لا كمان لازم يعمل تعاطف من خلال السياق الدرامى للشخصية الشاذة جنسياً.
و كمان يطلعهم couple لطفاء و يساعدوا اللى حواليهم و الناس متقبلاهم جداً.
برغم و أنا صغيرة لما كنت بتفرج على أفلامهم أن حد فى الفيلم يكون شاذ
دى كانت بتبقى شتيمة و منبوذ من المجتمع.
أحتمال تكون فكرة الشذوذ لقت تقبل من المجتمع الغربى خصوصاً الأمريكى
لكن اللى متأكدة منه أن المسلسلات و الأفلام ساهمت بشكل كبير جداً
فى وصولهم للتقبل و التعاطف معاهم بالشكل دة.
الفكرة هنا أن لازم نخلى بالنا من كل حاجة بنتفرج عليها
لأن بشكل غير واعى يا هتزرع فى عقلنا فكرة أيجابية يا هتوجهه عقلنا
من غير ما نحس لأفكار مغلوطة و سلوكيات غلط.
حبيت ذكائهم أوى فى تركيزهم على زرع قيم و أفكار معينة
حتى لو بعض الأفكار دى مش بتتناسب مع ثقافتنا و الدين بتاعنا.
لأن على الأقل هما ليهم هدف شغالين عليه.
فى المقابل الأفلام و المسلسلات بتاعتنا (اللى مبتفرجش عليها) كل اللى بتركز عليه الأنحلال فى المجتمع.
بدل ما يكون فى نماذج معينة ناجحة أو التركيز على زرع قيم أو أفكار معينة
زى (يوميات ونيس) اللى اتربينا عليه و زرع فينا قيم و أخلاق و قيمة العيلة.
دالوقتى يقولك نقل الواقع.
هل أحنا محتاجين حد ينقلنا الواقع اللى أحنا أصلاً متغرقين فى بؤسه و سلبياته ؟
و لا محتاجين حد يورينا أزاى نوصل للصح ؟
للآسف الأعلام و الميديا و الأفلام و المسلسلات قوى رهيبة بنستخدمها ضدنا بدل ما نستغلها لصالحنا.
دائماً بنقلد الغرب بس كالعادة بنقلدهم فى أسوء ما عندهم و فى القشور و السطحيات
أكتر من الحاجات اللى ممكن تفيدنا أو تطور مننا.
خلينا نعكس الواقع و نركز على الفساد و السئ
و نقول هى دى حياتنا بدل ما نقدم حاجة تقولنا نحسن من الواقع دة.
و رمضان قرب و يلا مستنين مسلسلات اكتر عن البلطجة
و تصوير الأغنياء أشرار و الفقراء بلطجيين و الطبقة المتوسطة بضيع.
و أستفدنا أية ؟
ضيعنا وقتنا اللى أتعلمنا أنه ملهوش قيمة و لازم يضيع.
و دى قصة مجتمع عايز يطور بس مقضى وقته باللعب فى الوحل.
#جرعة_من_جرعات_نور
#للأنوثة_وعلاج_العلاقات
#نور_البكري
