– جوزى خانى.
– بابا كان بيضربنى و أنا صغير و قاسى عليا.
– بيهتموا بأختى فى البيت و بيهملونى.
– أبنى مش بيبرنى.
– أتعرضت لتحرش.
و غيره من الأذى اللى ممكن يتعرض له الإنسان و بيبدأ يقول ليه يا رب بيحصلى كدة ؟
أول حاجة مهما كان نوع الأذى اللى بنتعرض له لازم نؤمن أن ربنا مش ظالم
و لكن البشر بتظلم بعضها و هيتحاسبوا على الظلم دة سواء أهلنا اللى ظلمونا أو حد غريب.
{ إِنَّ اللَّهَ لَا يَظْلِم النَّاسَ شَيْئًا وَلَكِنَّ النَّاسَ أَنْفُسَهُمْ يَظْلِمُونَ }
نقطة تانية مهمة جداً لازم ندركها أحنا فى أختبار و أبتلاء يعنى أية ؟
يعنى هنتعرض لمواقف و علاقات و ظروف إيجابية و سلبية و رد فعلنا هو (الإجابة بتاعتنا فى الأختبار).
مثال :
أم بتضرب بنتها (دة أبتلاء) البنت لما تكبر قدامها طريقين.
– يا تكبر و تبقى عاقه لأمها بسبب قسوة الأم و كمان لما تخلف هى كمان تكبر بناتها. (سقطت فى الأختبار)
– يا تكبر و برغم أذى الأم تبدأ تبرها و كمان تتعلم أزاى تربى بنتها بعيداً عن الضرب. (نجحت فى الأختبار).
مثال :
شخص معاه فلوس كتيييييييييييييير جدا.
– يا يتكبر على الناس و يصرفها على شهواته فقط و يشوف أنها بسببه هو.
– يا يشكر الله و يعرف أنها رزق و فضل من الله و يتصدق منها و يساعد الناس.
(وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ
* الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ* أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ)
(وَهُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ وَكَانَ عَرْشُهُ عَلَى الْمَاءِ لِيَبْلُوَكُمْ أَيُّكُمْ أَحْسَنُ عَمَلًا )
” إِنَّا جَعَلْنا ما عَلَى الْأَرْضِ زينَةً لَها لِنَبْلُوَهُمْ أَيُّهُمْ أَحْسَنُ عَمَلاً”
يعنى أحنا هنا فى أختبار مش موجودين بنلعب و خلاص و اللى الدنيا بتاخده هو بيبقى الخاسر الأعظم.
يعنى المطالب مننا طول الوقت أننا نركز فى اللى بنمر به و نجاوب صح (نحسن العمل).
عارفة أن الأختبار لما بيكون فى أذى مش بيكون سهل عليك و عليكى و أنا كمان الأذى مكنش سهل عليا
و الناس مكنش الأذى سهل عليهم بس كلنا بنمر بأختبار محدش لوحده فى الدنيا بيمر بده.
بس الفكرة هنختار أية ؟
1- نعيش فى الأذى و نفضل نتألم فقط و نضيع حياتنا.
2- نأذى زى ما تأذينا.
3- نركز أننا نحسن العمل عشان الحياة مؤقتة ؟
كل يوم بيمر علينا أحنا فى أختبار و عندنا فرصة الأختيار لحد آخر نفس لينا.
أنت هتختار أية ؟؟؟ أختيارنا بيحدد مش بس حياتنا دالوقتى, لا دة كمان بيحدد للآخره.
الجميل أن كل يوم بيمر علينا بتتجدد لنا فرصة الأختيار.
يا ترى لما يتجدد الأختيار هنختار أننا نحسن العمل؟
فتأذيت ؟ ها هتختار أية ؟
