بيقولوا الجواز مشروع أجتماعى فاشل و مفيش حد سعيد فى حياته الزوجية

عشان كدة هننشر العلاقات الناجحة الطبيعية و الموجودة و اللى عمرنا بنسمع عنها

عشان الناس دى صوتها مش عالى، اللى بيشتكى طول الوقت هو اللى صوته عالى.

قصة (4) 
أنا منة عندى 30سنة وجوزى اسمه محمد عنده 30سنة

اتعرفنا على بعض من 13 سنة بس كانت معرفة عادية جدا بس انا بعتبر نفسى عرفته من 10سنين

علشان اول 3 سنين مش بعتبرهم ضمن حكايتنا

علشان كده حبدا الحكاية من 10سنين لما اتعرفت على محمد وحبينا بعض وفضلنا مخبين شعورنا جوانا سنتين

لحد ايام ما كنا بنجهر لفرح بنت خالى واحنا بختار العفش بتاعها عجبتنى جداااااا اوضة نوم وهو واخواتى وماما

محدش شافها وقال عليها حاجة غير انها تجنن قالى ايه رايك تتجوزينى واجيبلك الاوضة دى

واخدناها هزار لانى كنت فاكراه بيهزر بس انا من جوايا كان نفسى يكون بجد وقال لماما جوزينى بنتك وقعد يكلم فى الموضوع ده فترة

وكان فعلا بيتكلم بجد الكلام ده كان فى شهر 9 وبعد 6 شهور كلم ماما رسمى وطلبتى منها

وكلم بابا وبابا وافق وفى اول الشهر السابع وبالتحديد يوم 9/4 يوم عيد ميلادى جه هو ومامته وباباه

عملى عيد ميلادى وكان احلى عيد ميلاد فى حياتى كلها

بس للاسف الفرحة دى مافضلتش كتير وحصلت مشاكل جامدة بين اهلى واهله ورحنا احنا فى الرجلين

واتفسخت خطوبتنا لمده 4 سنين بس هو مافقدش الامل ولا انا كنا بكلم بعض بس مش زى الاول طبعا

لحد ماجه يوم 10/2/2014 اتفاجئنا بيه بيتصل ببابا ويستاذن انه يجى يتكلم معاه بابا وافق وجه فعلا

وطلب منه اننا نرجع لبعض تانى وانه بيحبنى بابا قاله حفكر وجه سالنى قلتله بكل صراحة انى بحب محمد

وبابا عارف انى مش حتجوز غير عن حب قالى حتتعبى مع اهله قلتله حيحمينى منهم والحقيقة بابا الله يرحمه

احترم رغبتى وحبى ليه وقاله انه موافق وكتب الكتاب كا يوم 15/2 جهزنا للفرح ويوم 26/3 كان فرحنا

وكملنا قصتنا ورمينا كل الكلام ان الجواز مقبرة الحب وان نهايه الحب الجواز والكلام الفارغ ده

والحب زاد بيننا والتفاهم

بس الحياة طبعا مش وردى وزى اى حياة طبيعيه زى ما فى اوقات حب ودلع وفرحة فى اوقات

زعل ومشاكل وخناق بس الحمد لله احنا من البداية واتفقنا اننا مانباتش زعلانين مش مهم مين اللى يصالح التانى ويعتذرله

ممكن انا اكون الغلطانة وهو اللى يصالحنى او العكس مفيش فرق بيننا ومفيش مخلوق مهما كانت صلته بينا

انه يعرف حاجة عننا ولا يتدخل بيننا لدرحة ان فى مرة مامته قالتلى انتو مش بتتخانقو خالص قلتلها

لا بنتخانق هو فى بيت بيخلى من المشاكل بس احنا اتفقنا ماشين على الاتفاق

دايما خروج وفسح وياخد ماما واخواتى معانا

دايما اروح عند ماما وبشتغل رغم انه ضد الفكرة و عندى بنوتة اسمها منه على اسمى عندها 3سنين

والحمد لله عايشة احسن عيشة من حوالى سنة ونص كنت حامل فى بنوتة تانية بس للاسف

وانا فى الشهر التاسع المشيمة انفصلت وتوفت البنت فى بطنى رحت المستشفى علشان فى اعراض ولادة

كنت عند ماما وخدتنى ورحنا المستشفى وعرفنا البيبى خلاص مش قادرة اقول على دعمه النفسى ليا كان ازاى

ولا قادرة اوصف خوفه عليا لانى حقيقى كنت بين الحياة والموت بمعنى الكلمة وفضلت فى الحالة دى لمده 3شهور

وطول المده دى كل همه انه يكون جنبى طول الوقت لدرجة ان لقبه فى المستشفى الحبيب كنت فى العناية المركزة

وهو قاعد جنبى طول الوقت لوجايلى حد يزورنى وهو على بوابة المستشفى كان يسال عليا يوصلوه لحد باب الاوضة بتاعتى

بعد الزيارة كان يوصل ماما واخواتى البيت ويرجعلى كان بيغيب عنى لمده ساعة ونص بالظبط فى الوقت ده كنت الاقى

بتاع الباركينج فى المستشفى يطلع يسالنى مش عايزة حاجة لحد ما يجى الاستاذ محمد كان معروف المستشفى

بشكل مش معقول لحد ما الحمد لله جه يوم خروجى وفرحته اللى ماتتوصفش كملنا حياتنا واهى ماشية

الحمد على نعمة وجودك فى حياتى يا احلى حاجة فى حياتى وابو احلى ضحكة فى حياتى بنتى ربنا يخليكو ليا يارب.

ملحوظة : كل علاقة ليها ظروفها الخاصة كل علاقة ناجحة ننشرها خدى منها اللى يفيدك

و المش مناسب ليكى خلاص المهم تعرفى فى زواج ناجح و انك لازم تجتهدى فى علاقتك.
يلا بينا ندعى ربنا يبارك للأزواج اللى شاركوا معانا و يديم عليهم المودة و الرحمة و السكن

و يرزقك السعادة فى زواجك حتى لو ظروف زواجك مختلفة.

يا ريت تجمعى القصص دى و تحطيها قدامك دائماً عشان تبدئى تشوفى النماذج الناجحة

بدل النماذج الفاشلة اللى بتبقى قدامك طول الوقت و بنتأثر بيها.

جرعة نور – نور البكري