قصة (5)بعد الطلاق و الفشل فى علاقة هل تقدرى تلاقى الحب الحقيقى ؟
انا عجبتني فكرتك يا نور لاني بتضايق لما اشوف الناس بتقول ان الجواز مقبره للحب وان الشخصيات بتتغير بعد الجواز
والكلام المحبط ده وانا شخصيا عايشه احلى واهدى قصة حب وجواز في الدنيا
بدأت قصتي اني شفت جوزي عادي في خطوبة اختي الصغيره واتعرفنا على بعض هو صاحب خطيب اختي
اتحولت علاقتنا لصداقة وبعد فتره اعترفنا لبعض بالحب وده كان مرفوض بالنسبه لناس كتير
انا اتجوزت قبل كده واكبر منه في السن والطبيعي في مجتمعنا ان جوازنا يكون مستحيل
وبالرغم من كل ده صممنا نتجوز وهو حارب الدنيا كلها عشاني والحمد لله اتجوزنا بقالنا سنتين دلوقتي
وعملي فرح في الخطوبه وفي الدخلة وعندي بيت يجنن واهله بيحبوني جدا
و انا عنده بكل ستات الدنيا و هو عندي بكل رجالة الدنيا عمرنا ما اختلفنا ولا زعلنا من بعض
دايما بيفهمني وبفهمه من النظرة والناس بتحسدنا على علاقتنا كل اللي ناقصنا ان ربنا يرزقنا بطفل يكمل حياتنا الحلوه دي
ملحوظة : كل علاقة ليها ظروفها الخاصة كل علاقة ناجحة ننشرها خدى منها اللى يفيدك
و المش مناسب ليكى خلاص المهم تعرفى فى زواج ناجح و انك لازم تجتهدى فى علاقتك.
يلا بينا ندعى ربنا يبارك للأزواج اللى شاركوا معانا و يديم عليهم المودة و الرحمة و السكن
و يرزقك السعادة فى زواجك حتى لو ظروف زواجك مختلفة.
يا ريت تجمعى القصص دى و تحطيها قدامك دائماً عشان تبدئى تشوفى النماذج الناجحة
بدل النماذج الفاشلة اللى بتبقى قدامك طول الوقت و بنتأثر بيها.
جرعة نور – نور البكري
