خدعوك فقالوا الجواز (مودة و رحمة و سكن).
طيب قبل ما نكتشف الخدعة لازم نعرف حاجة كويس أن (المودة و الرحمة و السكن) دى ٣ أضلاع فى مثلث الجواز الأضلاع دى فعل ?
يعنى هيكون فى ضلع المودة فى الجواز يعنى : أنك هتود الآخر.
يعنى أية تود؟؟؟؟؟؟
يعنى تعمل ما يحب و يتمنى الآخر أنه يشوفوا منك سواء فى تعاملات أو كلام أو حتى على مستوى مظهرك.
تانى ضلع الرحمة: الرحمة أنك تكون لين رقيق المشاعر بتعفو و تسامح لما يغلط
و تتعامل بأحتواء و حب و حنان أثناء ضعف الآخر و دى محتاجة قوة.
الدليل أن محتاجة قوة لما بنيجى نقول لحد أرحمنى دة معناه (أنى فى موقف ضعف و محتاج رحمة الآخر اللى هى حنيه ممزوجة بقوة)
تساندنى و تطلعنى من اللى أنا فى.
ثالث ضلع السكن : و السكن هنا شامل سكن للجسد .. سكن للنفس .. سكن للروح.
و سكن جاية آخر حاجة لأنها نتيجة، مينفعش تتحقق غير بعمل الحاجات السابقة.
أنك توصل لأحساس السكينة مينفعش غير لما تعدى على محطتين المودة والرحمة غير كدة عمرك ما هتوصل للسكينة.
فخدعوك و قالوا إن الزواج مودة ورحمة و سكن.
ربنا مش بيخدع دة حقيقى جدا لكن الخدعة فى فهمنا أحنا أفتكرنا
لما هنتجوز هنلاقى (المودة والرحمة والسكن) و دة مش بنلاقيه دة أحنا مفروض نتعامل بى.
لكن أحنا عاوزين نحس الأحاسيس دى و أحنا:
-بنتعامل وحش.
-مبنفكرش غير فى نفسنا و احتياجاتنا.
-مش بنشبع أحتياجات الآخر و لا بنخاف على مشاعره.
-مش بنسامح و لا نغفر.
و مستنيين يكون الجواز الجنة اللى بنحلم بيها، جنة الأرض عشان تعيشها لازم تشتغل عليها عشان تلقيها.
(الزواج مودة ورحمة و سكن) دى القاعدة اللى لازم نمشى بيها عشان زواجنا ينجح.
و ربنا يرزقنا القوة جميعاً أن نحقق ال3 أضلاع دول فى مثلث الجواز عشان ننعم بجواز ناجح سعيد.
جرعة نور – نور البكري
