أنا عايزة أروح القاهرة.
فهقطع التكت و هركب القطر و القطر هيعدى على محطات و بعد كدة هوصل القاهرة
و لما اوصل للقاهرة هقدر أروح للمكان اللى عيزاه فى القاهرة بالظبط.
دة الترتيب المنطقى.
فى ناس بقى بتعمل أية ؟
1- أنا عايزة أروح القاهرة : فهسأل أزاى أروح القاهرة؟
بعد ما سألت بتستغرب ليه موصلتش القاهرة ؟؟؟؟؟؟؟؟؟؟؟؟؟???
(و النموذج دة بيمثل الناس اللى بتجمع معلومات و لكن مش بطبقها فى حياتها).
2- ناس تانية : أنا عايزة أروح القاهرة :
فتقطع التذكرة و بعد ما تقطع التذكرة متركبش القطر و تقف مكانها.
و تفضل تسأل نفسها هو أنا ليه موصلتش القاهرة ؟
(و النموذج دة اللى يفرح بالمعلومات و يطبقها يوم و بعد كدة بيكبر دماغه و ينسى)
3- ناس تالتة : أنا عايزة أروح القاهرة:
فتقطع التذكرة و تركب القطر و فى نص السكة تنزل محطة قبل محطتها.
و تقعد تعيط هو أنا ليه موصلتش القاهرة ؟
(و النموذج دة بيمثل الناس اللى بتتعب على نفسها و لكن بتيأس و هى فى الطريق).
4- ناس رابعة : أنا عايزة أروح القاهرة:
تعمل كل الخطوات لحد ما توصل القاهرة و لكن لسه بتسأل أزاى أوصل للقاهرة
و هى فى القاهرة و لكن عشان فى تصور خاص بيهم للقاهرة فمش شايفين القاهرة الحقيقية لما وصلوا لها.
(و النموذج دة بيمثل الناس اللى بتتعب على نفسها و بالفعل بتوصل لنتيجة
و لكن لأنهم متخيلين النتيجة الصح اللى متصورينها فقط فمش بيشوفوا أنجازاتهم).
5- ناس خامسة : أنا عايزة أروح القاهرة:
و بتعمل كل الخطوات و بتوصل القاهرة و بتشكر ربنا على أنه وفقها فى الوصول.
( و النموذج دة بيمثل الناس اللى بتتعب على نفسها و تستعين بربنا
و بتستغل أقل أمكانية فى الوصول لأهدافها و بتشكر ربنا)
يا ترى أنت من أى نموذج من النماذج السابقة ؟
لأن النموذج اللى بيمثلك هو بيمثل حياتك و بتحقق أهدافك و لالا.
