فى نوعية من الرجال حالياً بدأت تظهر أحذرى منها لأن مظهرها خادع.
رجل مش بيصرف على زوجته و هى بتشتغل و بتصرف على نفسها و على البيت و أحياناً بياخد منها فلوس.
و هو مش بيكون بخيل..
لكن الرجل دة مشكلته أنه متعلمش يتحمل مسؤوليه فى تربيته
و أتربى على الدلال الزائد المفسد و بيكون شخص غير ناضج.
من أكبر علاماته بيكون عايش لنفسه و لمتعه الشخصية فقط و حابب جو المغامرة.
بيهتم بجسمه جداً و شكله و مظهره و فى الغالب بيكون من الناس الكوول
اللى ممكن يكون له شلة بيسهروا و عايشين حياتهم.
ممكن يسافر كتير أو يصرف فلوسه على ملابس غالية أو مكان شيك
بمعنى أصح مُهتم بالمظاهر بشكل مبالغ فى و الرفاهية أهم حاجة عنده.
ممكن يكون ناجح فى شغله لكن الشغل مجرد مصدر للمال اللى بيصرف على متعه و أحتياجاته الشخصية ليس إلا.
فى بداية التعارف هو هيغدق عليكى بالهدايا الغالية و الحركات المجنونة
و دة هيلعب على عاطفتك و الحقيقة هو حتى بعد الزواج هيجيب لك هدايا غالية
لكن مش هيكون مسؤول عنك أو عن بيته.
و فى الغالب هو هيختار البنت على أساس أن شكلها حلو و لطيف و ستايل
أو من عيلة كبيرة (ممكن يكون بيحبها فعلاً) بس المظهر و الوجهة الأجتماعية عنده شئ أساسى.
هو بأختصار شخص غير مسؤول و بيهتم بالمظاهر و بنفسه فقط.
دائماً متنبهريش بأى حركات أوفر و زيادة ما قبل الزواج لأن فى الغالب بيكون مصدرها عدم توازن عند الشخص.
و لو أنتى تزوجتى بالفعل من شخص كدة هو ممكن يكون بيحبك فعلاً
بس لازم يعرف أنه مسؤول عنك و عن أولاده و عن البيت و لازم تضعى حد للموضوع دة
بالنقاش و المطالبة الدائمة بحقوقك بدون يأس و أستسلام لطريقتة.
