هل لو الشخص اللى بنحبه أتربى مع أب و أم مختلفين
فى ظروف مختلفة كان هيطلع نفس الشخص و هنحبه بردوا ؟
(andover) فى فيلم
كان فى دكتور جامعى بيحب مراته جداً و هى ماتت بعد جوازهم بفترة صغيرة
عن طريق الأستنساخ فى محاولات كتير من أستنساخ نسخة منها من جيناتها
و كانت عشان تبقى فى نفس السن اللى ماتت فى بتحتاج (3شهور) تكبر فيهم
كانت بتطلع نسخة من زوجته فعلاً بس كل مرة مبتحبهوش أو هو مبيحبهاش
فيحاول يعمل منها نسخة جديدة
و بردوا ميتقدرش تحبه يا مبيحبهاش
ليه ؟
لأن كل مرة هى بتبقى مختلفة تماماً برغم شكلها هوهو
لكن شخصيتها و سلوكياتها و طريقتها مختلفة
برغم شكلها واحد و جيناتها هى هى
لكن كل مرة كان بيديها لحد يربيها كانت بتطلع بشخصية مختلفة لأنها بتتأثر باللى بيربيها
فبتطلع شخص تانى نتيجة الخبرات و التربية و التجارب اللى مرت بيها.
مرة كانت مدمنة كحول.
مرة أنتحرت لتعلقها باللى بيتربيها و أحساسها بالرفض منها.
مرة حبت واحد تانى.
مرة هربت منه.
مرة حس أنها زى بنته.
كل مرة بيحصل غلط و مبتبقاش هى نفس شخصية زوجته اللى حبها
لأن مرورها بالتجارب و الخبرات و التربية مع أشخاص بعينهم بطريقة معينة
هى اللى خليتها الأنسانة اللى بيحبها
الفكرة أننا عبارة عن مجموعة تجارب و خبرات و مواقف مرينا بيها
و أداركنا و نظرتنا للى مرينا بى هو اللى بيحدد الشخصية اللى هنكون عليها
و اللى على أساسها بيتحدد مستقبلنا و على أساسها ممكن شخص ينجذب لينا و يحبنا
و أية الوظيفة اللى ممكن نميل ليها.
و أى تغيير فى احد التجارب دى أو الخبرات أو أدراكنا ليها
ممكن يغير من شخصياتنا و بالتالى من مستقبلنا.
اكيد اللى بنمر بى مبيحصلش عبثاً و ممكن منقدرش نتحكم فى
و الأكيد أكتر أدراكنا و نظرتنا للى مرينا بى يا يوصلنا لدور و حاجة عظيمة
بسبب اللى مرينا بى أو أسوء على حسب أدراكنا أو تعاملنا
جرعة نور – نور البكري
