ساب حبيبته و راح أتجوز واحده تانيه و بعد كدة هيحصل أية ؟
ظاهرة لطيفة لاحظتها بتتكرر فى الجلسات
أن زوجة تيجى تشتكى أن زوجها رجع يكلم حبيبته القديمة
أو أن واحدة كانت مرتبطة و بعد ما اللى كانت بتحبه أتخلى عنها و سابها
و راح أتجوز واحدة تانية رجع يكلمها تانى
طيب هو الراجل بيعمل كدة ليه؟
و أنتى كزوجة تتصرفى أزاى لو زوجك كلم حبيبته القديمة؟
و أنتى كبنت تتصرفى أزاى لو رجع يكلمك بعد ما أتخلى عنك و أتجوز؟
١_الصحوبية حاجة و الجواز حاجة
فى نوعية رجالة ماشية بمبدأ أن أنتى ممكن أصاحبك و نخرج و نتفسح
بس مش أنتى اللى هتجوزك
أنا أتجوز واحدة خام و اللى فى الغالب بتكون حبت و صاحبت بس واحد غيرك
و يكونوا مش بيحبوا بعض فيرجع يدور على حبه القديم
لأن مفيش تفاهم و توافق ما بينهم زى اللى كان بينه و بين حبيبته
٢_ بيسمع كلام مامته
مامته أختارت له العروسة بنت الناس اللى من وجهة نظر الأم
أن دى هى اللى تصلح تكون زوجة مطيعة فبيتجوزها حتى لو مش مقتنع بيها
فبيبقى مش متفق مع زوجتة فبيحن لحبيبته القديمة
٣_الأحتياج
بيكون عنده أحتياج شديد
زوجتة الجديدة مش قادرة تشبعه فى المقابل أن حبيبته بتشبع الأحتياج دة
(الأحتياج دة ممكن يكون (فكرى _ عاطفى _ روحى_جسدى
٤_المشاكل الزوجية
فى نوعية من الرجالة لما تحصل مشكلة مش بيحاول يحلها
لكن بيبدأ يهرب من المشاكل دة بعلاقة مريحة بالنسبة له مفيهاش مسؤولية أو مشاكل
فعقله بيبدأ يدور على أكثر حد كان بيريحه (و اللى هى حبيبته القديمة)
طيب أنتى كزوجة تتصرفى أزاى؟
فى الغالب سبب ٣ و ٤ ليهم حل و بيبقى سهل خصوصاً فى البداية
لأنها بتكتشف أحتياجات زوجها و تبدأ تشبعه و تعرف أية الحاجات اللى نقصاه
و بتكملها بيكون مجهود فى الأول بس هتلاقى نتيجة
فى حالة ١ و ٢ بيبقى ليها حلول بس على حسب شخصية الزوج
و مدى عدم التوافق و الأنسجام اللى ما بينهم
بالنسبة بقى للبنت اللى بيكلمها الزوج
أجرى مدخليش نفسك طرف تالت
متسمحيش تكونى مجرد إشباع احتياج لحد فشل فى أنه يختار صح أو يقدرك
متسمحيش أنك تكونى حل لمشكلة هو هربان من مسؤولية مواجهاه
و متسمحيش أنك تكونى سبب فى تدمير علاقة انتى ملكيش ذنب أصلاً فى تدميرها
.
.
و رسالة للراجل
قبل ما تتجوز أتأكد أن دى الإنسانة اللى فعلاً عايز تكمل حياتك معاها و هى اللى بتملاء عينيك
و بلاش نظرية دى للحب و دى للجواز لأن هتدفع تمن أختياراتك
.
رسالة للبنت: متقبليش براجل غير و أنتى متأكدة أن باب الماضى أتقفل
و أنتى قلبك دائماً بيحس فحسيتى قلبه مش معاكى بلاش تلعبى قمار بقلبك
لأنك هتفضلى تتوجعى و تحاولى تظبطى فى علاقتك معظم الوقت و هتبقى خايفة يبص برا دائماً
كفاية علاقات ثلاثية الأضلاع لأنة بيبقى طريق بيتلف فى على الفاضى و المليان
و كل أضلاعه هتتألم و هتأذى الضلع الآخر
العلاقة خطين مستقيمين ماشيين بالتوازى
بهدوء و أنسجام غير كدة هيبقى وجع قلب و عالفاضى
#جرعة_من_جرعات_نور
#للأنوثة_وعلاج_العلاقات
