مشاعر الآلم الناتجة عن:
_من أن شخص طول الوقت بيقلل مننا.
_من أننا وثقنا فى شخص بنحبه و هو خان الثقة.
_من أننا أتعشمنا أوى و أتخذلنا.
_من أن حد رفضنا و هو كان الشخص الوحيد اللى فارق معانا يتقبلنا.
أو غيره من المواقف…….
أى مشاعر آلم ناتجة عن موقف قوى هزنا و وجعنا و كان سبب لكسرة بداخلنا.
ناخد بالنا كويس أوى أن الآلم دة هيعتبر نقلة لينا فى حياتنا.
الآلم دة لو أستغلناه صح و تقبلنا اللى حصل هيخلينا نرتقى و نبقى أفضل.
لو رفضناه هناخد قرارات و سلوكيات نستخدمها فى حياتنا كدفاع عن نفسنا و هضرنا أكتر ما هتنفعنا.
و التقبل مش معناه أننا نؤيد اللى حدث و ننبسط به و لكن نتقبل خلاص دة اللى حصل و مفيش آله زمن ترجعنا نمنع حدوث التجربة أو الموقف.
المهم هنتصرف أزاى مع اللى حدث و نستفيد منه أزاى ؟
مثال:
واحدة حبت شخص أوى و سابها بعد كدة بدون مبرر.
هى شعرت بآلم شديد أوى.
قدامها طريقين:
طريق (1) تتقبل الآلم و تبدأ تتعلم تختار صح و تتوكل على ربنا عشان يساعدها فى أنه ينور بصيرتها دائماً و تدرك أن وجودة أكيد كان هيأذيها أو هى كانت بتعمل أخطاء فى العلاقة و تدرك أية الأخطاء سواء على مستوى النفس أو التعاملات و تصلحها فهيحدث أرتقاء نتيجة الآلم.
طريق (2) تتعقد من الرجالة و تقول الرجالة كلهم أندال و كل ما يقرب راجل منها تبهدله و ممكن كمان تبعده عنها بشكل غير واعى لأنها خايفة يتكرر معاها التجربة السابقة.
طريق (2) سهل بس مش هيحدث أرتقاء و لا تطور.
طريق (1) صعب و ممكن يكون طويل و فى مجهود بس هيعمل نقله و أرتقاء و تطور و هيكون الآلم له نفع هينعكس على جميع جوانب الحياة ليس العاطفى فقط?
أى شعور بنشعر به بيكون من أجل يدفعنا للتحرك و أخذ موقف و رد فعل لكن أحنا اللى بنختار الأتجاه اللى نتحرك فيه.
حاولوا تقروا المقال تانى فى هدوء و اعملموا محاكاة لحياتكم و قرروا هتختاروا أى طريق؟ و هل مستعدين تغيروا دالوقتى و لالا؟
#جرعة_من_جرعات_نور
#للأنوثة_وعلاج_العلاقات
