أغنية عمرو دياب (يومينهم) من أجمل الأغانى اللى بتعبر عن عدم التعلق و تقدير الذات
و محاولة السيطرة على الذات و كمان الأحساس بالوفرة
يومينهم وهييجى غيرهم ⬅️ أحساس بالوفرة و أن الدنيا فيها أكتر من شخص ممكن يرضى قلبنا
يا قلبى ما تسيبك منهمهم ⬅️ فيها محاولة للسيطرة على الذات
انساهم تلاقيهم ورا ضلك ماشيين .. هتنشغل ليه بيهم خليهم عايشين
توضيح لفكرة أن عدم التعلق و الحرية النفسية بتؤدى أن الشخص فعلاً ممكن يرجع
بس بردوا مش معنى كدة أننا نرجع لهم
– متفكرش ان انت يا قلبى ترجع تانى تعيش ايامهم .. بعد ما كانوا اغلى حبايبى
احنا فى حالنا وهما فى حالهم ⬅️ خطاب مع الذات مرة تانية و محاولة السيطرة على الذات
حتى لو فى مشاعر حنين
ياما يا قلبى قدمنالهم اكتر من الحب اللى ف بالهم .. قاموا جرحونا وسكتنالهم وافتكرونا سلمنالهم
توضيح للذات أنها عملت أفضل ما عندها فى المقابل كان فى أذى و جرح
و لكن الشخص اللى بيقدر ذاته مبيسمحش لحد يستغل حبه أو طيبته و بيبداء ينسحب
يومينهم وهييجى غيرهم 
أنا عارفة عمرو لما غنى الأغنية مفصصهاش كدة
بس حلو أنكوا تسمعوا الأغنية لو مريتوا بتجربة أنفصال قريب أو عدم تقدير مشاعر
لأنها هتوصل معانى جميلة يا ريت نتعلمها
و دومتوا فى حياة عاطفية سعيدة مع ذاتكوا قبل مع الناس
