مين المفروض يكون فى حالة عطاء الذكر و لا الأنثى؟
لما بيسهر فى الشغل وقت أضافى عشان يسفرك المصيف دة مش عطاء
لما بيحميكى طول الوقت دة مش عطاء!!
لما حتى بيقدم ليكى الأحتواء و أنتى مرهقة نفسياً دة مش عطاء!!!
طيب و هى لما بتهتم بيك و بتفاصيلك؟؟
لما كل يوم بتقول ليك كلام حلو تبداء به يومك دة مش عطاء؟؟؟
لما حتى تتصل بيك تطمن عليك دة مش عطاء!!!
طيب بعد الكلام الحلو دة تعالوا نعرف أصلاً يعنى أية عطاء؟؟؟؟
.
العطاء يعنى : بعطى اللى قدامى حاجة بحبها و سهلة عليا فبالتالى مش بحس بمجهود لما بديها
فبالتالى مش هستنى مقابل و مش هندم على عطائى دة.
فشرط العطاء: حب نوع الحاجة اللى بعطيها و مكنش بضغط على نفسى.
فبالتالى عشان أنتى أنثى هتميلى أكتر للعطاء المعنوى و الدعم النفسى و التعبير عن المشاعر بأشكال مختلفة.
و هو عشان راجل هتلقيه بيهتم بالعطاء المادى و حتى مشاعره بيعبر عنها أكتر بطريقة مادية.
مش معنى كدة أن الراجل مش هيعطى معنوى و لا الأنثى مش هتعطى بشكل مادى لكن دة معناه
أن كل واحد هيبقى مميز أكتر فى نوع عطاء و سهل عليه.
فالعلاقة عموما بين الذكر و الأنثى قائمة على العطاء المتبادل لتكامل العلاقة.
فمينفعش نقول أن فى شخص لازم يبقى طول الوقت فى حالة عطاء و التانى أستقبال لأن هيبقى أسمه أستنزاف.
و لو فى طرف دائماً بياخد هيتولد جواه الأنانية و لو فى طرف دائماً فى حالة عطاء هيجى وقت و هيحس بالأستغلال و هيتوقف عن العطاء.
برغم أن الأبحاث أتعملت في أنجلترا وجدت أن الأنثى أكثر عطاء و مشاركة في العمل و العطاء الخيرى عن الذكور
و أن التبرعات بتكون أغلبها 89% من الأنثى.
و دة طبعاً لطبيعة الأنثى العاطفية و تعاطفها.
بس لن ننكر أن الجنسيين عندهم عطاء حتى لو أختلف قدر و شكل العطاء
جرعة نور – نور البكري
