في 7 حاجات مهمة جداً و من غيرهم هيموت الحب فى العلاقة
Masters & Johnsonفى 7 عناصر وضعوها الباحثين
و اللى قالوا أنها تتكون منها الحميمية و بتزيد الحب و بتساعد على أستمراريته
العناصر دى و ببساطه و بأختصار
الأهتمام
مفيش علاقة ممكن تنجح و تستمر غير بالأهتمام و رعاية مشاعر الآخر
و الذكاء بقى فى الأهتمام لما تعرف تهتم بالطرف الآخر بالطريقة اللى هو بيحبها.
المشاركة
المشاركة بتعمل ترابط قوى جداً بين الشريكين ممكن المشاركة تكون على مستوى الأفكار أو المشاعر أو الأنشطة
أو الحاجات اللى بتهمنا و المشاركة فى وقت الزعل مش مجرد بنتشارك الأوقات السعيدة و بس
الثقة
مفيش علاقة من غير ثقة لأن أنعدام الثقة يعنى أنعدام الأمان و دة معناه الأحساس بالتهديد طول الوقت بدل الأحساس بالحب.
الألتزام
يعنى نكون ملتزمين طول الوقت بتقديم الحب و التواجد و و يكون فى أهتمام و مشاركة و ثقة.
الصدق
الصدق فى العلاقة يعنى وضوح و الوضوح بيولد أمان و بيكون فى تفادى للمشاكل اللى ممكن تظهر
لو خبينا عن طرف الآخر حاجات مهمة بالنسبة له أنه يعرفها.
عدم وجود الصدق هيفقدنا نقطة الثقة.
التعاطف
لازم يكون عندى أحترام و تقدير لأفكار و مشاعر الآخر و منستقلش بيها.
زى كدة مينفعش نقول أنت زعلت من حاجة تافهه أو مفيش داعى لكل الزعل دة.
الملامسة
ألمسوا بعض اللمس بيعمل قرب و محبة و اللمس غير مرتبط بالمشاعر الجنسية بس مش معنى أتجوزنا
يبقى مفيش لمسة أيد أو حضن دافى أو نقعد و أحنا فى حضن بعض.
دة ود و دفا هيفرق فى العلاقة جداً.
و مش معنى أن فى علاقة مفهاش اللى فات تبقى علاقة لازم تنتهى لكن علاقة
محتاجين نشتغل فيها على تواجد العناصر المفقودة اللى هتزود الحب و الود ما بينا.
الحب نقدر نكبره و نبنيه واحدة واحدة بأفعالنا و تصرفاتنا اللى لازم هتثمر بعد البذل و الجهد.
جرعة نور – نور البكري
