الطبخ بأنوثة و دلع
هو أنا أقدر أفعل القيم بتاعتى حتى و أنا بطبخ ؟؟؟؟؟
معظم الناس دائماً بتفتكر تفعيل القيم مرهق أو محتاج وقت خاص عشان تتفعل لكن الكلام دة غير صحيح.
لأن أى نشاط بنعمله نقدر نفعل القيم بتاعتنا و أحنا بنعمل النشاط دة.
طيب يعنى أية تفعيل قيم ؟
تفعيل قيم يعنى قيمة مهمة جداً بالنسبة لى و مهم بالنسبة لى أستشعر وجودها فى حياتى طول الوقت.
طيب دى هطبقها فى المطبخ و الطبيخ أزاى
تجربتى المتواضعة هشاركها معاكوا ممكن تلهمكوا سواء فى المطبخ أو الشغل أو التنظيف أو العلاقات أو غيره.
(أنا من قيمى (البساطة - الجمال - الرفاهية - الأبداع - الحرية
طبقتها فى المطبخ كالآتى
قيمة البساطة
بطبخ أكلات بسيطة و سهلة و فى نفس الوقت لذيذة.
مبعملش طبعاً و لا محشى و لا مكرونة بشاميل و لا محمر و لا مشمر.
و مع ذلك اللى بيدوق أكلى بيلقيه لذيذ برغم أنه بسيط.
لدرجة أن فى ناس ذقته و قالت لى أكلك لذيذ ببساطة من غير تكلف.
قيمة الجمال
أهم حاجة و أنا بشترى الخضار يكون ألوانة زاهية و شكله حلو.
لما بشترى منتجات بحب أشترى الحاجة اللى تصميماتها شكلها حلو.
بحب ألمس الخضار و أنا بطبخ بحس دة هيفيد بشرتى.
لما باجى أقطع بصل أو حاجة هتأثر على ريحة أيدى بلبس جوانتى.
بحاول أراعى أكلى يكون صحى على أد ما أقدر عشان أحافظ على جسمى.
- الصابون السائل للمواعين ريحته لازم تكون حلوة بفواكه و كنت بجيبه الأول بالجلسرين عشان البشرة
بس أنا بلبس جوانتى و أنا بغسل المواعين فبالتالى مش محتاجة جلسرين
قيمة الرفاهية
- بشترى دائماً منتجات جودتها كويسة فى حدود البادجت اللى معايا حتى لو فى عروض على حاجة جودتها أقل
بتجاهلها بدل البادجت تسمح أنى أجيب الجودة الأعلى.
- دائماً بحاول أجيب الحاجات المتحضرة زى مثلاً بسلة متفصصة و فاصوليا متقطعة.
- مبحبش أكل فى أطباق بلاستيك أو ستانلس أو أطباق فيها شرخ أو شكل و لونها وحش.
قيمة الأبداع
- تقريباً نادراً لما بطبخ أكله سألت حد على مواصفاتها بدخل و بخترع مرة عملت
(تارت لحمة بالخضار - مكرونة بالخضار - مكرونة بخلطة افتكستها بالجبنة - فراخ بالجبنة اللبنه و الطماطم و البصل)
مش شرط كلهم بالنسبة لى تطلع وصفة ناجحة على أد ما ببقى عايزة أعمل حاجة جديدة و أجرب.
قيمة الحرية
- بحس أنى حره أطبخ اللى عيزاه بالطريقة اللى عيزاها مش متقيدة بوصفة أو مقادير معينة
ألا لو حاجة طبعاً مينفعش بمشى على الكتالوج و خلاص
طبعاً اللى بعمله دة مش لازم تعمليه هى الفكرة كلها دى قيمى أنا.
ممكن تكون قيمك مختلفة تماماً المهم عيشيها فى تفاصيل حياتك بطريقتك و أسلوبك.
كل لما هتعيشى قيمك هتعيشى نفسك أكتر و تقربى منها و تتواصلى معاها
جرعة نور - نور البكري
