سر الراحة النفسية!
لو من 5 سنين كان حد زارنى من المستقبل قالى هتوصلى للراحة النفسية دى, و الله مكنتش هصدق.
أنا كنت عايشة فى آلم لا ينتهى و ذكريات مؤلمة محبوسة فيها.
بالإضافة أنى شخصية حساسة و عاطفية جداً يعنى أصلاً أقل كلمة بتوجع.
كنت بلوم نفسى على كل حاجة و كنت شايفة أن كل حاجة وحشة بتحصل بسببى.
كنت محبوسة فى آراء الناس المحيطة اللى معظمها بيقول ( أنتى فيكى عيب - أنتى فيكى نقص - أنتى لازم تكونى حاجة, أنا أصلاً مش عيزاها).
كنت باخد قرارات غلط و ضد مصلحتى و بتغرقنى.
كنت شايله جوا قلبى حمل و معظم الوقت بعيط.
بسعى و أنا بعيط و بتآلم و مش قادرة.
بس النتيجة دالوقتى و الله مش قادرة حقيقى أوافى شكر الله على نعمُه.
كل اللى حصل أن يوم أتمنيت يا رب عايزة حاجة تمحى الذكريات اللى وجعانى.
و سعيت فى الحياة و أتعلمت كتير و غيرت من أفكار كتير و سلوكيات و بدأت أتحسن فعلاً بس لسه فى حاجة جوايا مسيطرة عليا و لسه معنديش سيطرة أوى على قراراتى و سلوكى و مشاعرى و فى وقت بحس لسه بنغزات الآلم و الذكريات بتيجى تسلم عليا و بتزورنى و معاها آلام.
لحد ما أتعرفت على تقنيات P.E.A.T و حقيقى محت الذكريات و الآلم و أتنقلت نفسياً نقله قوية جداً و حلمى فى أنى ألاقى حاجة تمحى الذكريات و الآلم أتحقق.
بس برغم دة كان فى فراغ مش عارفة دة أية سببه, حقيقى الفراغ دة تم سده (بحفظ القرأن).
مش بقول مبتواجهنيش مشاكل و لا أنى على طول سعيدة و بضحك بس.
بس بقيت قوية فى سلام و معايا أدوات أقدر أساعد نفسى بيها و المشاعر بقت مش مؤلمة بل ضيف خفيف برحب به لحد ما يمشى.
تعاملى مع نفسى فى رحمه و حب أكتر.
قادرة أتعامل مع ناس بحب و فى نفس الوقت قوة و ذكاء.
كنت الأول بتعامل بقلبى أوى ... يا بعقلى و قوة أوى و دة كان بيخرب العلاقات.
الفكرة أن أوعى تيأس أبداً من أن حياتك تكون أفضل .. أسعى بالمتاح حتى لو بتطبيق كلمه قريتها صدفه.
كمل فى سعيك و كل مدى هيظهر لك ليفل أعلى و معاه أدوات متاحه أقوى من اللى قبلها.
أن مرحلتك الحالية مجرد مرحلة بدل قررت أنك تتحمل مسؤولية نفسك.
و نصيحة ذهبية : أنفق وقتك و مجهودك و فلوسك على التعرف و تطوير الداخل .. الخارج مجرد رسالة متحاولش تغيره .. الرسالة مش عشان تغيرها و لكن عشان تقرأها.
لأن وقعت فى الفخ دة و أخدت وقت و مجهود كبير أوى فى محاولة تغيير الخارج و الناس و الظروف و دة بيعطل ليس إلا.
العملية بتكون من الداخل للخارج.
أتمنى لك رحلة سعيدة فى الحياة قد يكون بها تحديات و لحظات يأس و لكن يطغى عليها الإصرار و عدم الأستسلام.
#جرعة_من_جرعات_نور
#للأنوثة_وعلاج_العلاقات
