الأنوثة ضعف! من أخطر القناعات اللي بتتصدر للأنثى

من أخطر القناعات عن الأنوثة اللي بتتصدر للأنثى, خصوصًا في المجتمع الشرقي.

 "إن الأنوثة ضعف".

لدرجة أصبح في ربط عجيب عند بعض الناس إن الأنثى عشان تكون أنثى جذابة وناعمة،

 لازم تكون ضعيفة وقليلة الحيلة وغبية ومكسورة الجناح.

الأنثى مش عشان تتصل مع أنوثتها لازم تكون هبلة وبيضحك عليها، وبتقول حاضر على كل حاجة وخلاص، وتكون مبتفهمش ومجرد تابع ملهوش أي دور أو نفع في الحياة.

حال الضعف المستمر غير محمود ولا لذكر ولا لأنثى، وفي فرق بين ضعف قلة الحيلة والغباء وقلة القيمة وبين الضعف الأنثوي المقصود به اللين ورقة القلب واستخدام الذكاء بدلًا من التصادم،

 وقدرتها على التنقل بسلاسة ما بين القوة اللي بتدفع الشخص ياخد موقف وبين الضعف اللي بيحتاجه الموقف عشان تكسب الموقف وقدرتها على الخضوع بكامل إرادتها وادراكها لمن تحب.

وتقبلها للحالين "حال القوة، وحال الضعف" وقدرتها على الأتصال بالحالين.

لكن تصوير الأنوثة على أنها "ضعف, كسرة جناح, كائن مسكين غلبان" .

دا حال أنثوي غير متزن لأنثى في الغالب بتعاني في حياتها بسبب ضعفها وقة حيلتها.

أو مخاوف أنثى إنها تكون ضعيفة لأنها أتأذت كتير بسبب مشاعرها.

أو أحلام وأماني شخص عنده حب سيطرة وتحكم, وعايز يسيطر على الأنثى عشان يستشعر قوته من خلال قهرها,

كتير إناث بتعاني بسبب دخولها في علاقات مريضة وسامة "بسبب ضعفها"

كتير إناث مش قادرين يكونوا قدوة لأولادهم أو يمثلوا لهم نموذج للأنثى المتزنة والشخص اللي يقدر يدافع عنهم أو يضع حدود "بسبب ضعفها"

كنت بتفرج على فيلم عن الشطرنج "Searching for Bobby Fischer" في الفيلم كان في أم لطفل عبقري في الشطرنج، الأم تمثل نموذج الأنثى المحبة والناعمة ولكنها كانت قوية مش ضعيفة،

لما الأب اللي هو زوجها بدأ يضغط على أبنه ويسئ استغلال موهبته.

بدأت تاخد موقف بمنتهى القوة والحزم إنه لو متوقفش عن اللي بيعمله، هتاخد أبنها وتمشي.

حبيت المشهد دا جدًا وكنت حابة الشخصية في الفيلم "لأنه نموذج أنثى نعمة ولطيفة ولكنها قوية مش هتسمح لأذى أبنها حتى لو كان من أبوه".

فالأنوثة في حد ذاتها قوة والأنثى القوية بأتزان هينعكس عليها كزوجة وكأم وكشخص فعال في الحياة وكعابدة حتى لله.

ومش مطلوب من أي أنثى تكون ضعيفة، بل بالعكس مطلوب تكون قوية ومقدرة نفسها لكن بأتزان، 

السر كله في "التوازن"، السر كله في التنقل بين أحوالها بسلاسة.

وتعرف أمتى تستخدم "الضعف" أو حتى تتقبله كحال، وأمتى تستخدم "قوتها" وأزاي تستخدمها.

الأنوثة مش ضعف غير عند اللي بيخافوا من "قوة الأنثى" حتى لو كانت الأنثى نفسها أو أنثى رافضه أنوثتها عشان خايفه تكون سبب في أذيتها.

#جرعة_من_جرعات_نور

#للأنوثة_وعلاج_العلاقات