أزاي تتخانق في علاقاتك بذكاء عاطفي؟
أزاي تتخانق في العلاقات خصوصًا العاطفية بذكاء عاطفي؟
بحيث متتقلبش عليك الترابيزة،
وتوصل لحل للمشكلة بدلًا من تصعيد الخلاف.
أولًا: أختار وقت الخناقة:
بلاش تتخانق في وقت أنت في قمة الغضب ومش هتقدر تتحكم في كلامك.
عشان هتقول كلام في الغالب هتندم عليه، وهتصعد المشكلة.
أو وقت الآخر يكون غضبان أو تعبان أو جعان.
هيكون مش مستعد ولا يسمع ولا يتناقش ولا يتفاهم.
وقت الخناقة مهمة جدًا في استجابة الآخر ليك والوصول لحل وتسوية للخلاف.
ثانيًا: الخناقة تكون ثنائية مش جماعية:
بلاش الخناقة تكون بين الأهل أو قدام الصحاب أو الولاد.
لأن بين الأهل الموضوع هيكبر جدًا، وفي الغالب الخناقة ممكن تخلص بينكم لكن مش هتنتهي عند الأهل وهيظلوا فاكرين ومتأثرين.
ولو قدام الصحاب ممكن يكون في احراج وكمان يدخلوا بشكل يعقد الموضوع أكتر.
والولاد طبعًا ممكن يتأثروا، وكمان ممكن ياخدوا موقف ضد أحدالوالدين.
الخناقة لما بتكون ثنائية بتخف التعقيد وبيكون حلها أسهل في البداية.
ثالثًا: خناقة face to face:
بلاش الخناقات على الواتس اب أو التليفون.
لأن التفاهم وجهًا لوجه بيكون أفضل ورسالتك من الكلام بتوصل أحسن للطرف الآخر.
لغة الجسد مع الصوت مع الكلام بتكون أدق من غياب لغة الجسد.
رابعًا: حدد مشكلتك بدقة:
بلاش تتكلم عن مشكلتك أو احتياجك، بشكل مصطلحات أو عام غير مفهوم للشخص الآخر.
يعني بلاش : أنا محتاج أنك تهتم بيا.
لكن قول: أنا محتاج تهتم بيا بأنك تسمعني وتركز معايا وتبص لي وأنا بكلمك.
لأن لو قالك حاضر ههتم بيك، وهو ميعرفش الاهتمام بالنسبة لك.
مش هيعرف بردوا يقدمه بالطريقة اللي تقصدها.
خامسًا: أحكي المشكلة ولا تتهم الشخص بها:
أحكي المشكلة كأنك بتحكي موقف حصل قدامك، وقول مشاعرك أنت.
بدون ما تتهم الآخر.
مثال "لو بتتهم شخص": أنت مهمل وأناني ومش بتفكر غير في نفسك.
مثال "لو هتحكي المشكلة بذكاء": لما بتتأخر في الشغل كتير وبعد كدا بتنزل مع صحابك.
دا بيحسسني أني مش محبوبة ومش مرغوب فيا وكأن مليش مكان في يومك وفي وقتك.
ودا بيوجعني وكنت أحب أنك تخصص وقت ليا في يوم.
الطريقة دي بتفرق كتير جدًا، لأن بتحول الشخص الآخر من متهم بيشعر بالهجوم عليه فبالتالي عايز يدافع بالهجوم عليك إلى شخص بيسمعك أكتر ومش هيقلب الترابيزة عليك.
سادسًا: بلاش تعميم:
يعني بلاش أنت عمرك ما عملت كذا...
أو أنت دائمًا بتعمل كذا....
لأن التعميم هيحسس الشخص إن لو عمل حاجة لم تقدر وتم نفيها.
الأفضل تقول احتياجك اللي أنت محتاجة من الشخص.
دي كانت Tricks هتفرق معاك جدًا في أي خناقة.
ولو حتى المشكلة موصلتوش لحلها،
الخناقة مش هتزود من المشكلة وتعقدها أكتر وتشحنكم بمشاعر الغضب أكتر.
خناقة هيكون فيها انفتاح وتعبير عن الذات والمشاعر ومحاولات للتفاهم،
أكتر من أني بأذي الطرف الآخر وبسحب من رصيدي عنده.
وتخلص الخناقة مش طايقين بعض وحتى مش قادرين نبص في وش بعض.
الذكاء العاطفي حتى في الخناقات ممكن نستخدمه وهيفرق معانا كتير.
#جرعة_من_جرعات_نور
#للأنوثة_وعلاج_العلاقات
