كيف تتخلص من الحزن الداخلي
هل عمرك حسيت بحزن جواك مش عارف توصفه؟ أو يمكن جربت تقاوم الوجع اللي جواك بس من غير فائدة؟ مش لوحدك، كتير مننا بيمروا بمرحلة زي دي في حياتهم، بس السؤال الأهم هو: كيف تتخلص من الحزن الداخلي؟
عشان كده احنا في جرعة نور هنساعدك تتخلص من الحزن الداخلي وتستعيد توازنك الداخلي، وفي المقالة دي هنجاوب على كل الأسئلة اللي بتتعلق بالحزن الداخلى وكيفية التخلص منه.
ما هو الحزن الداخلي؟
هو شعور الحزن اللي بتحسه جواك من غير ما تظهره لحد، يعني، زي لما تكون حزين ومضايق، بس محدش حواليك ملاحظ ده، زي ما تقول، هو حالة نفسية بتحس بيها جواك ومش بتقدر تعبر عنها بسهولة للناس حواليك.
بيكون زي حمل تقيل جوه قلبك، ومش عارف تشاركه أو تعبر عنه بالكلام، وممكن يسبب لك مشاكل أو ضغوطات، أو حتى حاجات صغيرة تفضل تتجمع لحد ما تبقى شعور كبير ومزعج.
ما سبب الحزن الداخلي؟
الحزن الداخلي ممكن يكون له أكتر من سبب وتختلف من شخص للتاني، ومنها:
- فقدان شخص عزيز: فقدان حد مقرب سواء كان صديق أو فرد من العائلة، وانت مش عارف تتجاوز شعور الحزن ده.
- الضغوطات اليومية: مشاكل في الشغل أو الدراسة، أو أي ضغوطات حياتية بتخليك تحس بالتعب النفسي والإرهاق.
- العزلة: شعور الوحدة أو عدم وجود أشخاص يدعموك ويقفوا جنبك، بيخلوا عندك شعور إنك دايمًا لوحدك، وده ممكن يسببلك شعور الحزن.
- الفشل في تحقيق الأهداف: لما تحس إنك مش قادر تحقق أحلامك أو أهدافك، ده بيعمل جواك شعور بالحزن وإنك مش عارف تعمل حاجة.
- المشاعر المكبوتة: عدم القدرة على التعبير عن المشاعر حتّى لو كانت سلبية، بيسبب عندك تراكم للمشاعر وبيحولها لمشاعر داخلية في صورة حزن، مش عارف تتجاوزه.
- المقارنات بالآخرين: لما تقارن نفسك بغيرك، وتحس إنك أقل منهم، ده بيخلق شعور بالحزن، مهم أنك متقارنش نفسك بحد، لأننا مختلفين عن بعض في كل حاجة: ظروفنا، قدراتنا، اهتماماتنا، وغيره، قارن نفسك بنفسك قبل كده، وشوف انت محتاج تركز في ايه عشان تنجح.
- الأزمات النفسية: زي الاكتئاب أو القلق اللي ممكن يكون سبب في شعور الحزن الداخلي اللى بيحصلك فجأة.
دائمًا مهم نتكلم ونعبر عن مشاعرنا مع حد نثق فيه، لأن ده يمكن يساعد في تخفيف الحزن.
ما هي أعراض الحزن الداخلي؟
أعراض الحزن الداخلي ممكن تظهر بطرق مختلفة، والتفاصيل كالتالي:
- الشعور بالتعب والإرهاق: حتى لو مفيش مجهود كبير، بتحس دايمًا إنك مرهق وعايز ترتاح.
- فقدان الاهتمام بالأشياء: حاجات كنت بتحبها زي الهوايات أو الشغل بتفقد جاذبيتها ومبقاش ليها طعم زي الأول.
- العزلة والانطواء: بتحس إنك مش عايز تشوف حد أو تتكلم مع حد، وبتفضل تبعد عن الناس.
- مشاكل في النوم: ممكن تبقى مش قادر تنام كويس أو بتنام كتير أوي، وده بيأثر على يومك.
- البكاء المفاجئ: تلاقي نفسك بتعيط من غير سبب واضح أو موقف يستدعي البكاء.
- تغيرات في الشهية: يا إما مش بتاكل خالص وبتفقد الوزن، يا إما بتاكل أكتر من الطبيعي وبتزيد في الوزن.
- الشعور باليأس والإحباط: بتحس إنك مكتئب وإن مفيش حاجة تستاهل الفرح، وبتبقى مش قادر تشوف أي أمل في المستقبل.
كيف تتخلص من الحزن الداخلي؟
عشان تتخلص من الحزن الداخلي، في شوية خطوات ممكن تساعدك تهون على نفسك:
- اتكلم مع حد: حاول تتكلم مع صديق قريب أو فرد من العيلة عن مشاعرك، الكلام ممكن يساعدك ترتاح نفسياً.
- اكتب مشاعرك: حاول تكتب اللي جواك في مذكرات، الكتابة بتساعدك تعبر عن نفسك وتفهم مشاعرك بشكل أفضل.
- اهتم بنفسك: خد وقت لنفسك، مارس هوايات بتحبها، أو حتى خليك في أماكن بتحس فيها بالراحة والسعادة.
- ممارسة الرياضة: الرياضة بتحسن المزاج وتنشط الجسم، حتى لو مش بتحب الرياضة، حاول تمشي في الهواء ووسط الشجر، ده بيساعدك تحسن من نفسيتك.
- تقبل مشاعرك: اعترف بمشاعرك واسمح لنفسك تحس بيها، لحزن شعور طبيعي ومش عيب انه يكون عندك.
وفي النهاية، لو انت حاسس بالحزن الداخلي ومش عارف تتخلص منه، متقلقش، في دايمًا حلول، المهم إنك متفضلش ساكت ومحتفظ باللي جواك.
ابدأ بالخطوات الصغيرة زي إنك تتكلم مع حد تثق فيه أو تخرج وتغير جو، ولو مش عارف تلاقي الحلول بنفسك، ممكن تلجأ لمتخصص يساعدك تتخطى الحزن ده.
انضم لورشة "جرعة شفاء - تقنيات P.E.A.T المستوى الأول" مع جرعة نور وابدأ رحلتك نحو التعافي والسلام النفسي، احجز مكانك الآن وتدرب على أقوى وأعمق تقنيات للعلاج الشعوري تقنيات P.E.A.T
