لماذا أجذب العلاقات السامة؟
ليه دايمًا بنقع في فخ العلاقات السامة، ومتمسكين بيها وعايزين أنها تكمل معانا في حياتنا؟ ممكن يكون السؤال ده بيدور في بالك كتير، وبتلاقي نفسك بتعيد نفس السيناريوهات مع أشخاص مختلفين، زي ما قالت نانسي في أغنيتها: لو كان ده حب يا ويلي منو
لو كان نصيبي أعيش في جراح، حاعيش في جراح.
بمعنى: حتى لو وجودي مع الشخص ده، هيسبب ليا ضرر وأذى فأنا مستعدة أعيش الأذى مع الشخص ده.
وبنفضل نتسائل:لماذا أجذب العلاقات السامة؟ في جرعة نور، هنساعدك تفهم السبب، وازاي تتخلص من الدوامة دي وتبني علاقات صحية تستحقها، لأن حياتك تستاهل إنك تعيشها من غير دراما ولا تعب قلب، فخلي تركيزك معانا وهنكون جنبك في كل خطوة.
ما هي العلاقة السامة؟
العلاقة السامة من أكتر المصطلحات اللي بقت منتشرة بشكل كبير الفترة دي، وهي بتكون علاقة مليانة بالانتقادات المستمرة، والسيطرة الزيادة، وعدم احترام الحدود الشخصية.
في العلاقة السامة بيكون شعور بالاضطراب وعدم الراحة، هو المسيطر في العلاقة، وبيكون التواصل مع الطرف التاني مرهق، وكمان بيؤثر على صحته النفسية والعاطفية، من أول ما تبدأ تلاحظ إن صحتك النفسية بتتدهور بسبب العلاقة، وإن العلاقة دي بتسبب لك ضرر وأذى نفسي وانت مكمل فيها، وبتبذل مجهود فالعلاقة عشان تستمر، هنا لازم تعرف إنك في علاقة توكسيك.
لماذا أجذب العلاقات السامة؟
تربية الإنسان من صغره بتكون الأساس اللى بيُبنى عليه شخصيته وطريقة تعامله مع الآخرين، وده بيأثر بشكل كبير على نوع العلاقات اللي بيدخل فيها لما يكبر:
لما الطفل يكبر في بيئة فيها والدين بيعانوا من حالة مزاجية غير مستقرة أو علاقة زوجية مليانة مشاكل، بيبدأ الطفل يشعر إنه لازم يتجنب الغضب والمزاج المتقلب للأهل، وده بيخليه ينشأ على فكرة إن نجاح أي علاقة يتوقف على إنه يرضي شريكه على حساب نفسه وسعادته.
في نوعية من الناس بيكون عندهم هدف دائم لإصلاح وتغيير اللي حواليهم، وده بيخليهم فريسة سهلة للعلاقات السامة، وبيبقى عندهم أمل إن الشريك السام هيتغير للأفضل، وده بيخليهم يستمروا في العلاقة حتى بعد ما يشعروا أنهم في وهم التغيير.
عشان كده، من المهم إنك تكون واعي إن العلاقات السامة واحدة من أخطر أنواع العلاقات، لأن الطرف التاني بيبدأ العلاقة بطريقة رومانسية جداً، بيجذبك له وبيخليك تعتقد أنك في علاقة مثالية، لكن لما بيضمن وجودك، بيبدأ يظهر على طبيعته.
اعرف أكتر عن كيفية تجنب العلاقات السامة عشان تحمي نفسك من تأثيراتها السلبية.
ما هي علامات العلاقة السامة؟
لما تكون في علاقة سامة، لازم تكون واعي لعلامات معينة بتوضح لك إنك لازم تنهي العلاقة، وفي السطور اللى جاية هنتعرف مع بعض على العلامات اللي تدل على أنك في علاقة سامة، وكمان إزاي تتعامل معاها:
- الشعور المستمر بالخوف: لو العلاقة بتخليك تحس بالقلق والخوف بدل الراحة والأمان، ده مؤشر أنك في علاقة سامة.
- سعي الشريك لتغييرك: في العلاقة الصحية، انت بتتقبل زي ما انت مش محتاج تعمل مجهود عشان تعجب الطرف التاني، بس في العلاقة السامة دايمًا الطرف التاني بيحاول تغييرك بشكل جذري.
- التمسك بالماضي: لو لقيت نفسك عايش على ذكريات الماضي الحلوة وبس، وبتتمسك بالعلاقة عشانها.
- الشك والتبرير المستمر: لو كنت دايمًا في موضع شك وتبرير لأفعالك، ده علامة على أنك في علاقة سامة.
- الأذى النفسي والجسدي: لو العلاقة بتسبب لك أذى نفسي أو جسدي، يبقى ده مؤشر واضح إنك لازم تبعد عنها.
خطوات لإنهاء العلاقة السامة
في السطور اللى جاية، هنتعرف مع بعض بالخطوات إزاي نتخلص من العلاقة السامة بشكل نهائي عشان نحافظ على صحتنا النفسية والعاطفية، وهي:
- التعرف على العلامات: افهم العلامات اللي بتظهرلك وبتوضحلك أنك في علاقة سامة أن العلاقة اللي بتعيشها هي علاقة سامة، وأنك تستحق الأفضل.
- حدد الأسباب: حدد الأسباب اللي عرفتك أنك لازم تنهي العلاقة، ووضح لنفسك ليه العلاقة مبقتش مناسبة لك.
- التواصل مع الشريك: اتكلم مع شريكك بصراحة ووضح له إنك محتاج تنهي العلاقة.
- اختيار المكان المناسب: لما تكون حابب تاخد خطوة المواجهة، لازم تختار مكان مريح علشان تقدر تتكلم وانت مرتاح بدون ما حاجة تأثر على قرارك.
- لا تتردد: أيوة لازم تكون صاحب قرار وبدون تردد، وخليك واثق في نفسك وقرارك عن إنهاء العلاقة.
- استمع للشريك: خلي شريكك يعبّر عن مشاعره، لكن لو حاول يضغط عليك علشان تتراجع، لازم تعيد توضيح قرارك بوضوح وتأكد عليه.
- تجنب الاستنزاف العاطفي: متديش الفرصة لشريكك انه يحاول يضغط عليك بطريقته أو يستعطفك علشان ترجع في قرارك.
- فلو انت ناوي تنهي علاقة سامة، حاول تقضي وقت مع نفسك وتفكر في مشاعرك، وكمان ممكن تتكلم مع أصحابك أو مع شخص مختص، ده هيساعدك تعدي المرحلة دي وتبدأ من جديد بطريقة صحية.
انضم لدورة "جرعة شفاء" من جرعة نور، لتساعدك لتكون نسخة غير جذابة للعلاقات السامة، وتكون محصنًا ضدها
وفي النهاية، مش كل علاقة بنمر بيها بتكون صحية أو مفيدة لنا، أحيانًا ممكن نلاقي نفسنا بننجذب للعلاقات السامة من غير ما نعرف، لكن المهم هو إنك تبدأ تفكر وتفهم ليه ده بيحصل، عشان تقدر تغير الواقع وتختار اللي فعلاً يستاهلك.
