اصله ركع يوم الفرح اول ما شافها يا رب جوازة زى دى
اصله شالها و لف بيها يوم الفرح متتجوزيش غير عن حب
أصلها بترقص و فرحانه و هو بيغنى
متتجوزوش غير عن حب.
.
.
أحب أقولكوا والله مش دة الحب و مش دة اللى بيحدد نجاح الجواز.
كل دة عيش حالة فرح و طبيعى ناس تعبر عن فرحتها.
لكن الحب اللى بجد بيبتدى لما يتقفل عليكوا باب و يبداء التعامل ما بينكوا.
لما تتعبوا و لما تحزنوا و لما تتوجعوا و لما يمر أيام عليكوا فيها روتين
و أيام تانية كل الدنيا مقفلة فى وشكوا.
بيبان لما تقفوا فى ضهر بعض و تراضوا بعض و تسامحوا بعض و تتغافلوا عن أخطاء بعض.
غير كدة محدش يكلمنى عن حب فى لحظة فرح
عشان دة بداية دخول على اختبار حقيقى ليس إلا ?
الحب الحقيقى بيظهر بعد وقت من الجواز يا يظهر و يكبر يا يموت للأبد و احنا اللى بنختار.
الحب الحقيقى سعى و بذل و مجهود فى العلاقة و تعب بس تعب لذيذ.
كفاية تعليقات من دى عشان ما تبوظوش عقل الشباب
عن العلاقات أكتر ما هو بايظ بالله عليكوا
جرعة نور – نور البكري
