بتتهم ربنا أنه السبب يبقى أقرأ المقال دة
بتتهم ربنا أنه السبب يبقى أقرأ المقال دة
حبيبك سابك بعد ما ظلمك و مع ذلك ربنا كرمه؟
جوزك خانك و حسيتى ليه كدة يا رب؟
ليكى أب بيضربك أو مبيصرفش عليكى و أم مطلعة عينك؟ و شايفه ليه ربنا مخلاش ليا أب و أم كويسين
عندك حاجات كتير اوى حسيتى ان فين ربنا لما الناس دى عملت كدة؟
خلينا عارفين كويس أوى أن ربنا مش بيتحكم فى تصرفات حد و الدليل
و نفس و ما سواها فألهمها فجورها و تقواها
يعنى احنا دائما قدامنا الطريقين فأى ظلم وقع عليكى عشان الشخص اللى قدامك هو أختار دة مش ربنا
طيب ربنا بيكرم الناس دى و سايبها ليه؟
و مين قالك أن كل حاجة شيفاها خير للى قدامك هى خير فعلا
و مين قالك أنها حتى لو خير أنه مش هيتحاسب على الغلط اللى عمله؟
و مين قال أنه مش ممكن الشخص دة ظلمك و فعلا ندمان على اللى عمله و بيستغفر ربنا دائماً
(لازم تثقى فى كلام ربنا قال(و ما ربك بظلام للعبيد
طيب و أنا خلاص كدة أتظلمت و اللى كان كان؟
مين قال أن ربنا هيسيبك هنا بقى يكمن الموضوع فى نظرتك أنتى لربنا
ربنا فين و ظالم و غضبانة منه ؟
فبالتالى أنتى بتتهمى ربنا طول الوقت من جواكى و ساخطة عليه حتى لو مبتصرحيش بده
فأنتى فى اللحظة دى فقدتى ايمانك بى و برحمته
و فى فكرة أنا أتظلمت و لكن (أليس الله بكاف عبده) ساعتها بتطلعى برا نفسك
و بيكون وكيلك الله فبالتالى هو هيكون خير عوض ليكى و هيكون سند ليكى
هنا بردوا انتى بتختارى بعد الظلم اللى وقع عليكى أكون مع الله و استعين بى و بقدرته و قوته
و لا أفضل ساخطه عليه بسبب أن شخص ظلمنى.
انتى هنا بتبقى عاملة زى حد زعل من أب علم أبنه أزاى يستخدم السكينة فى اللى يفيده و أدهاله و راح الأبن قتل
الايمان بالله مش حركات صلاة و حجاب بس و دة اللى اتعلمناه فى المجتمع دة
الايمان بالله يعنى تثقى فى ربنا أنه عمره ما هيكون السبب فى ضررك و أن حتى لو أضريتى من شخص
هو اللى هيقدر يعوضك و يحميكى و يرجع لك حقوقك
لو شايفة ربنا السبب فى ظلمك عادى معظمنا عدى بالمرحلة دى المهم أرجعى له عشان مش هو المذنب
و هو فعلا الوحيد القادر على عوضك و أنه يجيب لك حقك الوحيد اللى رحمته عمرها ما هتنقطع عنك
الا لو انتى رفضتيها و مع ذلك بردوا هيرحمك بأنه يبعت لك رسائل ترجعى له و بردوا هيفضل يرزقك
و مش هييأس منك زى ما عمره ما يأس من الطاغية فرعون.
أرجعى له هو الله العدل الرحيم و لا حول ولا قوه الا بالله
جرعة نور - نور البكري
