ليه الرجالة بتخاف من الجواز؟
ليه الرجالة بتخاف من الجواز؟
إجابة السؤال سؤال تاني
ليه البنت عاوزة تتجوز اكتر من الولد؟
لأن البنت أقل في إشباع احتياجاتها من الولد
بتفتكر الجواز هيشبع لها احتياج الحرية أو الحب أو الإنجاز أو الرفاهية..... الخ
فبالنسبة للبنت للجواز إشباع لاحتياجات ملحة جواها اكتر من حب للشخص أو التمسك بفكرة الجواز نفسها
و ليه دالوقتي احتياجات البنت بقت اكتر من زمان؟
مع تفكك الأسرة اللي هي المفروض مصدر إشباع جميع الاحتياجات العاطفية و المادية فبداء يبقى في حرمان و احتياج
عشان في خلل في جزء غير مشبع فبتتخيل أن الجواز هو الملاذ أو اللي هيعوضها عن الحرمان دة
ليه الجوازات بقت فاشلة؟
لأن البنت بتدخل الجواز في حالة جوع عاوزة تاخد على اد ما تقدر من اللي اتحرمت منه
معندهاش اي أدنى استعداد تدي عاوزة تشبع احتياجها العاطفي و بتنسي تماما
أن اساس نجاح العلاقة العطاء و الحب في المقام الأول و طبعا الطرف الآخر اللي هو الراجل منتظر السكن المودة و الرحمة
عشان روحه تقوى و يقدر يواجه الحياة و يحقق نجاحاته فمبيلقيش الأنثى اللي تقوى روحه و يبداء أدائه يقل في حياته العملية
و يبداء ميقدرش يشبع احتياجها اللي هي اصلا متجوزاة عشانه
فبالتالي يجيبوا اولاد يربوهم في جو أسرى مفكك و ميشبعوش احتياجات الأولاد
نرجع بقى لأول سؤال ليه الرجالة بتخاف من الجواز لأنه عارف هو مشروع هيخرج منه خسران
لأن شايف العلاقات كلها فاشلة هي جت عليا انا هنجح اروح اجيب واحدة ادفع لها مهر و شقة و شبكة و عفش
و اصرف عليها و احميها عشان في الاخر تحرمني كل حقوقي و أولها توفير بيت هادي جميل مليان حب و سكينة
و كل اللي عوزاة مجرد سيل من الطلبات العاطفية و المادية بالإضافة لجرعات نكد صباحية و مسائية
فبيقرر يركز في شغله و حياته لأنه عارف لو جاب واحدة مش هيبقى بيختار شريكة حياة لكن بيختار حد عايز يرعاه
و يتشقلب عشان يراضيه و مش هيرضي
المشكلة؟
أن الست صدقت أن السعادة الزوجية في ايد الراجل فأطلقت عليه خاين أو مبيحسش أو غيره
عشان تداري عيبها في أنها مش قادرة تحتويه لأن هي عايزة تاخد و مش عارفة تدي الحاجة الصح
مش عارفة تحتويه صح لأنها مشغولة بأنها عاوزة تاخد و عاوزة تسيطر عليه مع العلم انها هتاخد و تسيطر كمان
لو عرفت في الاول تحبه فعلا و تديه اللي هو محتاجة فعلا
لو الست عاوزة راجل فالرجل محتاج ست تكون حقيقية ست زي ما ربنا خلقها
جرعة نور - نور البكري
