ممارسة الرياضة للمرأة بأنوثة
هل ممكن أمارس الرياضة بأنوثة ؟
من المعروف أن قيمة الجمال عند الأنثى مرتفعة
تحب أنها تكون جميلة و محافظة على شبابها و جمال جسدها بس فى أسئلة دائماً بتتوجه لى
(أنا بلعب رياضة هل دة بيقلل من أنوثتى ؟)
خلينا متفقين أن لعب الرياضة ممكن يعزز قيمة الأنوثة و أحساس البنت بأنوثتها مش يقلل منها و هحصر دة فى 5 نقطة
أولاً : الرياضة و الجمال.
لو أنا بلعب رياضة لأن ربنا خلقنى فى أحسن تقويم و أنا حابة أحافظ على الجمال اللى ربنا خلقنى عليه
و أعززه بلعب الرياضة أو أنى بالعادات الغلط جسمى بعد عن الفطرة بتاعته فهبدأ أحبه
و أهتم بجسمى و وسيلة من الوساءل الرياضة فدة بيزيد أحساسى بأنثتى.
لو أنا بلعب رياضة عشان رافضة جسمى و شيفاه وحش و لازم أبقى جميلة دة هيبعدنى عن أنوثتى.
ثانياً : الرياضة و الصحة.
الصحة من أجمل نعم ربنا لو بلعب رياضة عشان أحافظ على صحتى و بعمل بناء جسدى صحى عشان
أحافظ على نعمة ربنا (الصحة) دة هيقربك من نفسك فبالتالى هيعزز قيمة الأنوثة.
ثالثاً : الرياضة و الأطفال.
و أنا بلعب رياضة بعمل تهيئة لجسدى عشان لما أحمل جسدى يقدر يستوعب طفل بداخلى و وزن أضافى
و يكون جسدى قادر يستضيف و يكرم الضيف الصغنن بقوة و حب يبقى دة بيعزز أحساس الأنوثة.
رابعاً : الرياضة و الشغف.
بلعب رياضة عشان أنا عندى شغف و حب للرياضة دى و بستمتع بيها دة بيعزز أحساسى بأنوثتى.
خامساً : الرياضة و النفسية.
أنا بلعب الرياضة عشان أتخلص من الطاقة السلبية و أعمل تنفيس لمشاعرى و أعمل ريفريش لنفسيتى دة بيعزز الأنوثة.
الفكرة أن كل لما كانت الرياضة بتخلينى أتواصل مع نفسى أكتر و بتعزز قيم مهمة بالنسبة للأنثى
زى الجمال أو الحب أو غيره من القيم بتكون الرياضة فى صالح أنوثتى.
طيب أمتى الرياضة بتبعدنى عن أنوثتى ؟
عايزة أثبت قوتى لشعورى بالضعف.
رافضة جسمى و مبحبهوش.
من منطلق المنافسة و أنى أكون أفضل من حد.
تناول هرمون التستوستيرون لبروز العضلات.
أثبات القدرة على فعل ما يفعله الرجل.
لعب الرياضات العنيفة بكثرة.
فالرياضة نفسها مش بتبعدنى عن أنوثتى لكن طريقة ممارسة الرياضة و شعورى تجاه الممارسة
هو اللى بيحدد اذا كان هيبعدنى عن أنوثتى و لالا.
جرعة نور - نور البكري
