القرآن العلاقة معاه مش أنك بس تقرأه و أنت مخنوق أو تقرأه عشان تجمع حسنات و خلاص.
جربت الطريقة دى و حقيقة مكنتش أفضل حاجة ليا على مستوى الفكر أو القلب أو النفس.
القرآن عشان نقيم علاقة سليمة معاه دة وجهة نظرى فى كذا نقطة :
أولاً : نيتنا التعرف على الله بجد بغض النظر عن أى أفكار عندنا.
ثانياً : نية أننا عايزين نعرف الحقيقة و الصح بغض النظر عن آهواءنا أو نظريات فى عقلنا عايزين نثبت أنها صح و خلاص.
ثالثاً : القرآن مفيش حاجة فى الدنيا فى الحياة و التعاملات من علاقات لبيزنس و تجارة لأهل لحقوق لظلم لكلام لطريقة لصوت لتعبيرات وجه لمشاعر لرزق لنفسية لأحكام
مش هتلقيها فى القرآن كل حاجة موجودة فعلاً.
و أكيد دة عشان نتعلم منه و نطبقه.
فتثبيت النيه يكون بالتطبيق فى الحياة.
رابعاً : أى علاقة فى الدنيا عشان تستمر لازم يكون فى تواصل و عشان نتواصل مش مرة فى الشهر لما أحس بخنقة و لا شهر فى السنة.
كل يوم تواصل مستمر هيكون فى علاقة هتنعكس بشكل كبير جدااااا على فهمك للقرآن هتفهم حاجات أول مرة بجد تدركها و تفهمها اوى كدة و قربك من ربنا و على راحتك النفسية و مع الوقت على سلوكك تدريجياً سلوكياتك هتتغير للأحسن.
خامساً : حفظ القرآن تكرار الآيات كتير له سحر غريب على النفس و القلب.
و أنا بحفظ و بكرر آيات معينة ممكن أنفجر فى العياط و حقيقى مش ببقى عارفة السبب بحس كأنى بتغسل من جوايا و بحس برقة فى قلبى.
انا بحب التحليل و أحلل السبب طيب لمست الآيات معايا فى أية أو ممكن عندى فكرة أية أرتبطت معايا بالآيه.
مفيش مهما حاولت مش بقدر أعرف السبب أبداً.
سادساً : الصلاة بيبقى التركيز فيها أعلى لأن مش سورة قصيرة و محفوظة و خلاص.
لا كل مرة آيات أو سور مختلفة فالتركيز مع الآيات و معانيها بيكون أعلى.
سابعاً : مع الوقت الدنيا بتصغر جوا القلب و آهواءك بتضعف و ربنا بيكبر و بيثبت أكتر فى عقلنا أننا هنقابله فبيفرق جدا فى أننا نتقى الله.
ثامناً : القرآن مش بيتاخد منه حته و خلاص.
القرآن عشان نفهم حاجة لازم نقراء كلام ربنا عن الحاجة دى فى القرآن كله.
لأن لو أخدنا حته و خلاص هيغيب عنا جزء كبير من الحقيقة.
فالقرآن له سحر و شفاء ما فى الصدور و بيكمل فراغ لا يمكن أى شئ فى الدنيا يسده مهما أشتغلنا على نفسنا و طورناها.
لكن بعلاقة مستمرة بأننا نفهمه و نطبقه مش نهجره و نخطف منه حتت كل كام شهر او نقرأه كأنه واجب و لازم يخلص.
نصيحتى : أبدأ و لو بصفحة واحدة فى اليوم و حاول تفهمها و ألتزم عشان تدريجياً يحصل الشفاء و لمس سحره.
مش هَدعى أنى بقيت أحسن إنسانة فى الدنيا لا طبعاً عندى عيوب و ليا أخطاء.
بس القرآن مع الوقت بيهذب و بيشفى ما فى الصدور و راحة نفسية و إرشاد فى الحياة.
و اللى يقول الدين ملهوش علاقة بالحياة أحب أقوله يبقى أنت لسه متعرفتش على القرآن.
لأن فيه كل ما يخص الحياة.
#جرعة_من_جرعات_نور
#للأنوثة_وعلاج_العلاقات
