نصائح ليك قبل ما تخون أو تتخان
12 نقطة ممكن تستفيد منها من قصة للمثل الأجنبى (اللى مش هذكر أسمه) اللى خانته زوجته.
حقيقى معرفش تفاصيل عن علاقتهم عشان أتكلم عن العلاقة نفسها
و لكن كل اللى قالته بنفسها لزوجها فى فيديو و هى بتعترف له بالخيانة أنها كانت بتبحث عن نفسها فخانته.
و دة مش فارق معايا لكن اللى فارق دائماً لما بيكون فى علاقة فيها شئ سلبي
أول حاجة بفكر فيها ممكن نعمل أية عشان منكررش التجربة السلبية فى علاقاتنا؟
و دة اللى توصلت له من خلال القصة دى :
1- أن الشخص اللى بيتقى الله و بيتعامل مع الله قبل الناس و صادق مع نفسه
مش هيأذى و يطغى فى علاقة تحت أى ظرف.
2- قرفان و زهقان و مش سعيد مع الشخص اللى اخترته يشاركك علاقة زواج
حاول تعرف المشكلة و تحلها معاه خصوصاً لو مستعد أنه يحل هو مش مستعد فى خيار (الطلاق)
بكل بساطة لكن الخيانة مش أوبشن.
3- العلاقة اللى بيكون فيها الرجل الرجولة غير متزنة و متجهه للضعف
فى المقابل الأنثى ذكورتها عالية بتكون الأنثى مستبدة جدااا و مسيطرة و ظالمة للرجل
(عدم توازن الأنوثة و الذكورة دائماً هيسبب خلل فى العلاقة)
4- كل ما هتتعلق بشخص كل لما هترضى على نفسك الإهانة أو الذل أو غيره
فى مقابل أن الشخص يتعطف و يكون معاك حتى لو بيأذيك.
5- الشخص اللى بيبحث عن نفسه عن طريق الغلط و أذى الآخر دة بداية لبعده عن نفسه
و الضلال إلا لو ندم و تاب و رجع عن فعله ده حالة تانية.
6- الرحمة أهم من الحب لأن اللى بيحب ممكن فى لحظة المشاعر تتقلب فيأذى و لكن الرحمه مش مرتبط بشعور تجاه شخص فهيرحم الآخر و هيخاف يأذيه مش هيطغى عليه مهما سولت له نفسه.
7- الشخص الأنانى و المتمحور حول ذاته دائماً بيكون مؤذى لأنه مش بيفكر غير فى نفسه فقط
و بيفصل نفسه عن الآخرين فمن أخطر أنواع البشر فى العلاقات لأنهم
و لا بيضعوا الله او البشر فى حساباتهم كل تركيزهم أريح و أبسط نفسى أزاى؟
8- لما تقوم بدورك بشكل سليم فى علاقة و الآخر يخون أو يغدر متندمش على الصح اللى عملته لأن أحنا فى أختبار فى أدق تفاصيل علاقتنا أنت أخترت أمام الله الصح و ربنا هيجازيك عليه و هو أختار الآذى فى العلاقة و هيتحاسب عليه المهم ركز فى دورك و أعمل اللى عليك.
9- الصداقة بين الرجل و الأنثى بسهولة ممكن تتحول لمشاعر عاطفية أو مشاعر حميمية بزيادة فلو بالطبيعى أن الصداقة و القرب الزائد بين الجنسين خطر, فللمتزوجين خطر جدااااااااااااا لأن سهل الرجل يميل لصديقته و سهل الأنثى تميل لصديقها هما بشر و فى هرمونات و دة هيكون غصباً عنهم بس هما مش لوحدهم فى طرف ثالث ممكن يتظلم فالحميمية الزايدة فى الصداقة مع الجنس الآخر مش مفضلة.
10- متحاولش أبداً تتوقع علاقتك هتمشى صح طول العمر و لالا لأن دة شئ مش بأيدك أنت فقط و مش أختيارك لوحدك كل اللى تعمله كون أنت الشخص القوى عشان فى حال الآخر آذاك بأى شكل تكون قادر تتعامل و تواجه.
11- لما تظلم شخص فى العلاقة متبررش غلطك لكن حس بآلم الآخر و حسسه أنك ندمان على جرحه طريقة الامبالاه و التبرير بتجرح الشخص أكتر ما بتهديه (أعتذر و أندم على غلطك).
12- و عادى أننا نغلط فى العلاقات لكن فى غلطات بتقتل الثقة و الثقة لما بتموت بيكون صعب جداً العلاقة تكون زى الأول لأنها بتكون زى العربية اللى فقدت أحد عجلاتها.
#جرعة_من_جرعات_نور
#للأنوثة_وعلاج_العلاقات
