بعد ما (منى) ضحت بكل حاجة علشان (احمد)
بعد ما (منى) ضحت بكل حاجة عشان (أحمد) أتجوز عليها.
و سكن مراته الجديدة فى الشقة اللى منى كانت بتحلم بيها و حرمت نفسها من كل حاجة عشان يشتريها و هى فرشتها حته حته و قبل ما تسكن فيها كان أتجوز فيها و قعد العروسة الجديدة فى الشقة الجديدة..
النقطة الأولى : التضحية فى الحب
فى ناس كتير بتقول أن هى اللى غلطانة عشان ضحت بكل حاجة عشان راجل.
و فى ناس شايفة أن التضحية فى الحب سمو و درجة عالية.
أنا موافقة أنها كانت مش متوازنة و أنها مع حب الآخر محتاجة تحب نفسها و تشوف نفسها و تهتم بها.
بس مش قادرة أشوف أنها أرتكبت خطيئة لأنها كانت بتحب بجد و كانت بتعطى من قلبها لجوزها و أولادها.
و لكن اللى محتاجين نعرفه أن مفيش حاجة فى العلاقات أسمها أعيش دور المضحى فى العلاقة لأن العلاقة قائمة على أدوار و عطاء متبادل من الطرفين و كل واحد بيعطى من خلال دوره.
هو لو فى غلط فهو فى حق نفسها لكن دة مش مبرر لفعل شخص مخادع و مش بس خدع زوجته لا و كمان رمى ولاده و بيتلاعب عشان ياكل من حق ولاده.
النقطة الثانية : تجاهل العلامات
لو منى غلطت فعلاً هى غلطت أنها أعطت حاجات حلوة أوى و صح للشخص الغلط.
و دة ظهر فى حوار جدتها معاها و هى بتقولها : كلنا كنا شايفين حقيقته و أنتى اللى كنتى مُصرة عليه.
فى علامات دائماً بتكون موجودة أن الشخص غير سوى أو مش بيتقى الله و ممكن يأذينا و أحنا بأسم الحب بنتجاهلها.
و على فكرة العلامات مش شرط فى التعامل معانا ممكن تكون فى التعامل مع المحيطين ما هتظل هى دى أخلاقه اللى هيجى يوم هيتعامل بها معانا.
بلاش نضحك على نفسنا و رأى الناس اللى حوالين مهم جداً لأن العاطفة بتعمى بصيرتنا و لكن اللى حوالينا حكمهم مجرد من العاطفة فبيكون أكتر حكمة.
بأختصار :
- حبى نفسك و متجيش عليها .. و متحرميش الآخر من حبك (التوازن) لأن دة دورك الرئيسى كأنثى أنتى مصدر الحب و الجمال.
- متتجاهليش الإشارات و ضعى آراء الآخرين فى الأعتبار.
- لو حبك كان مقابله خداع و غدر مش عيب فى حبك ده عيب فى اللى أتحب.
- كل شخص بيحصد ثمار أفعاله فهو هيحصد ثماره و أنتى هتحصدى ثمارك.
- حبى من قلبك أوى و لكن شغلى عقلك كويس.
- حقوقك اللى حطهالك ربنا متتنزليش عنها أبداً ربنا حطها عشان هو أعلم بالبشر مننا.
ملحوظة : الشخصية اللى زى منى هى من أنماط الشخصية الأنثوية ( شخصية بيتا ) بيكونوا قلبهم أبيض و بيتعاملوا بتلقائية و حب و للآسف بيضحوا دائماً بنفسهم من أجل اللى حواليهم.
هما محتاجين يقدروا ذاتهم أكتر و يحبوا نفسهم زى ما بيحبوا الآخر.
و اللى معملش أختبار أنماط الشخصية الأنثوية هو متوفر على الموقع مجاناً
#جرعة_من_جرعات_نور
#للأنوثة_وعلاج_العلاقات
