20 نصيحة هتفيدك وانت داخل 2021

20 نصيحة هتفيدك جدا و انت داخل 2021 :

1- أنك لو تجاهلت مواجهة نفسك .. الظروف هتجبرك على أنك تواجهها.

2- أن علاقتك تكون ناجحة و سعيدة مع شخص آخر قائمة على 3 حاجات 

- علاقتك مع الله

- علاقتك مع نفسك

- أختيار مناسب للشخص اللى هتدخل معاه فى علاقة

3- قرار بيصب لمصلحتك كل يوم يعنى نتيجة عظيمة.

4- أن السعادة مش فى الماديات و الخروج و صخب الحياة دى حاجات ممكن نعملها و لكن السعادة الحقيقية فى أنك تكون متصالح مع نفسك و مع أى ظرف بتمر به.

5 - كل لما هترفض حدث خارجى هيزيد الآلم و كل لما تتقبل هيزيد السلام و الأمل.

6- أن كل محنة فيها منحة بس لو سلمنا و حاولنا نشوفها بجد.

7 - أن لو فاكر قادر تتحكم فى ظروفك تماماً  يبقى أنت موهوم هو كل اللى تقدر تتحكم فيه نفسك فقط و أختياراتها.

8- أسعى كل يوم بس النتيجة عمرها ما هتكون بتاعتك فأسعى و توكل.

9- أن العلاقات لازم هيكون فيها خلاف و مشاكل و لكن المهم أنت مستعد تحل و لا لا.

10- فى فرق كبير جداً فى العلاقات بأنى أكون عايز أثبت أنى صح و بين أنى أعمل الصح.

11- أوعى تزعل أبداً على حاجة فقدتها, أحياناً الفقد بيكون رحمه و بداية عطاء مناسب لينا أكتر.

12- أن العفو و التسامح هو محتاجة قلبك أكتر ما هيكون محتاجة الآخر.

13- أن القيود مش ظروف و لكن أفكارك و مشاعرك اللى مقيد نفسك بيها.

14- أن الحياة مش شغل و مادة بس .. الحياة نفس و علاقات و روحانيات و شغل و مادة.

15- أوقات لازم تسلم لحكمة ربنا و تدابيره أكتر من أنك تعرف الحكمة.

16- أن أنت مش محتاج تغير العالم عشان تكون عظيم, يكفى أنك تكون أفضل نسخة من نفسك.

17- الأهم من وضع خطط و أهداف السنة, أنك تلتزم بعمل خطوات و لو صغيرة كل يوم خلال السنة.

18- لما تتوجع أتوجع أوى و عيط و أتجرح و آتألم بس أوعى تنسى تستعين بربنا و أنك تتعلم من الوجع و أنك تكون رحيم بنفسك أثناء الوجع.

19- الحقيقة ساعات بتوجع بس أريح على المدى الطويل (معروفة دى لطيفة قالتها زمان ?) فأوعى تهرب من أنك تعرفها أو تضحك على نفسك.

20- أن الناس فى الغالب بتكون واضحة من البداية بس أرجع للنصيحة اللى قبلها.

و دى نصائح أدركتها فى 2020 و اللى فات مات و لكن اللى خلف مماتش :D

يعنى 2020 ماتت خلاص و لكن هى خلفت دروس و تجارب نقدر نستفاد منها فى 2021.

و لو لم نستفاد 2021 هتكون مجرد أمتداد لـ 2020 و لكن بدروس أكثر قوة و قسوة  و أنا عارفة دى مش أمنية كتير مننا.

عام 2021 أهلاً بيك و حطيت لك نيه : أن أرى الله فى كل شئ و يكون عام نصر من الله من بعد التطهير.

يلا شاركونى نواياكم لعام 2021 حابة أعرفها و يتم ألهامى و ألهام الآخرين من نواياكم <3

 و كل عام و أنتم بألف خير مهما كانت الظروف و مهما كان اللى هيحصل و مهما كان اللى حصل <3

#جرعة_من_جرعات_نور

#للأنوثة_وعلاج_العلاقات