علاقة الفراخ بالعلاقات
أية علاقة الفرخة بالتلاعب و التعلق فى العلاقات ؟
عملوا أبحاث عن السلوك الحيوانى.
كانوا بيقدموا حبوب طعام مع كل مرة الفرخة بتنقر فى (زر بلاستيك) و وجدوا أن الفرخة بتنقر أكتر لما كانوا مش بيقدموا لها حبوب الطعام على أمل أنها تحصل على الحبوب كنوع من المكافاءة.
و خرجوا بالتجربة دى بمصطلح intermittent reinforcement - التعزيز المتقطع
و هو بيطلق على تقوية السلوك بأعطاء مكافاءت متقطعة و غير مستمرة.
و دة أية علاقتة بالعلاقات ؟؟؟؟
دة نفسه بيستخدم فى العلاقات لما شخص يدخل حياتك و يعاملك كويس أوى و بعد كدة يقلب معاملتة للأسوء بدون أسباب واضحة و بعد فترة يرجع يتعامل كويس تانى.
أو شخص فى علاقة معاك يتمنن عليك بمعاملة كويسة من وقت للتانى و فى غالب الوقت هو بيكون مطلع عينيك.
دة بيدفع الشخص الآخر أنه يكون فى العلاقة طول الوقت منتظر لحظة المكافأة.
أنا هعمل أفضل ما عندى و هقوم بدورى كويس و هستمر فى العلاقة عشان اللحظة اللى أنت هتعاملنى فيها كويس.
و طبعاً الشخص بيستمر فى علاقة و متعلق بلحظة المكافأة مع شخص بيتلاعب به و غير مستقر و غير متوازن.
طيب مين أكتر شخص بيقع فى نمط العلاقات دة ؟
الأشخاص اللى فى الصغر كانوا الأب و الأم بيعاملوهم بشكل متقلب يوم عشان مزاجى رايق هعطيك الحب و اليوم التانى لا.
أنت النهاردة شايفك طفل كويس و مطيع و اليوم التانى أنت طفل سئ بسبب تصرفك.
هى الفكرة وصول رسائل عكس بعض للطفل.
و طبعاً لما بيكبروا بيكون سهل جداً يدخلوا علاقات مع أشخاص بيتعاملوا معاهم ( intermittent reinforcement - التعزيز المتقطع)
و مش هيقدروا يخرجوا من العلاقات دى غير لما يقدروا ذاتهم و يحبوها و يدركوا بداخلهم أنهم يستحقوا علاقة سوية و مستقرة و فيها حب سوى متبادل.
و أنهم مش فرخة منتظرة بقايا الحبوب يجروا عليها لما تترمى لهم من وقت للتانى.
كفرخة ممكن تقع فى الفخ بس الإنسان تميز بالعقل يقدر ياخد القرار لما يدرك ?
#جرعة_من_جرعات_نور
#للأنوثة_وعلاج_العلاقات
