الناس اللي بوشين
فكرة الناس اللى بوشين اللى بيظهروا و بيقولوا أنهم بيحبونا و هما منافقين و بيخططوا للأذى أو بيستغلونا أو بيكدبوا علينا.
الحقيقة هى فكرة مش مرعبة لأننا لو تعمقنا فى الموضوع آخرنا هنعيط و نغضب لنا شوية و نضايق شويتين و نبقى مش مصدقين كام يوم.
و فى الآخر الناس دى آخرها هتتنسى و لما نفتكرهم عقلنا هيبص لذكرياتهم بقرف أو لو مر فترة طويلة هيضحك عليهم و على أننا عيطنا عليهم من الأساس فى يوم من الآيام و خلاص.
لكن فكرة أنهم مُرعبين و أننا خايفين من الناس دى و خايفين ندخل علاقات عشان منتجرحش تانى.
فكرة بتعمل من الأفعال الرخيصة و الأفكار المريضة قيمة و كمان بتجعلها تأثر على حياتنا بالسلب.
برغم الحياة زى ما فيها المنافق و الكداب و اللى بوشين و المؤذى فيها الوفى و المخلص و الجدع و المحب بجد.
فمش هنحرم نفسنا من علاقات حلوة و سوية عشان علاقة مشوهه مرينا بها .
- حقك تحزن و تتآلم يومين و تعيط و تولول على حظك كمان لو عايز.
و لكن بعد النواح أرجع قوى تانى و أقوى من الأول و أنت متعلم درس مش معقدك لكن زادك حكمة و قوة و نبهك لأكيد حاجة عندك محتاجة تتظبط.
و أدخل بقوتك و حكمتك العلاقة الجديدة و يا سيدى أسوء الأمور وقعت فى عينة مريضة تانية أفتكر اللى قدرك تنسى و تقوى و تتعلم من التجربة اللى فاتت هيقدرك و يقويك و يعلمك فى اللى جاى.
القوة مش بالهروب من الشئ دة أسمه خوف .. لكن القوة أنك تتيقن أنك قادر تواجه الشئ و تتعامل معاه.
ممكن محدش يقول خايف تانى من صحابى و حبايبى يكونوا زى مروة صاحبة لؤلؤ ??
عشان اللى مش عارف مين لؤلؤ دة مسلسل مصرى بخيال هندى :D
#جرعة_من_جرعات_نور
#للأنوثة_وعلاج_العلاقات
