فى العلاقات مش كلنا بيكون عندنا نفس القدرة
فى شخص علاقته بالبحر أنه يلعب على الشاطئ فبالتالى هيحتاج شخص يلعب على الشاطئ معاه هيجيبوا جردل و جروف و يرشوا مياه على بعض.
بس ده آخرهم.
فى شخص علاقته بالبحر ينزل يسبح بس لازم يكون له طول و لامس الرمله طول الوقت و يخاف ينزل فى منطقة فيها عمق لأنه مش هيحس بأمان.
فهيحتاج شخص يسبح معاه فى مكان لهم طول لأنه مش هيستحمل يقعد على الرمله مع حد مش بيسبح لأنه تذوق طعم أنه يكون فى وسط البحر.
فى شخص علاقته بالبحر يدخل يسبح فى الغريق و لا يهمه و مستعد يتعامل مع الأمواج و دة بيحتاج معاه شخص عنده شجاعة كافيه يدخل معاه فى الغريق و يكونوا متعاونين عشان يقدروا يتعاملوا فى وسط المخاطر اللى هتقابلهم.
و فى شخص عايز يدخل فى الغريق و مش بس كدة
هو عايز كمان يغوص فى أعماق البحر يستمتع بأسماك و شعب مرجانية عمره ما هيستمتع بها لو بيسبح على سطح البحر.
و دة هيحتاج شخص عنده الجراءة و الأستعداد و المهارة أنه يغوص معاه.
ففى العلاقات بلاش تطلب من شخص بيلعب على الشط يغوص فى عمق البحر هيغرق.
و متطلبش من شخص بيغوص فى عمق البحر يسبح و هو له طول هيحس حاجة نقصاه و مش هيستحمل.
و اللى بيسبح و هو ملهوش طول فى البحر و بيحب يواجه الأمواج متطلبش منه يفضل على الشط هيجى وقت و يجرى على الغريق و الموج.
و هكذا فى العلاقات مش كلنا بيكون عندنا نفس القدرة و المرونة العاطفية و الأستعداد النفسى و المهارات الحياتية أننا نكون فى عمق علاقة حميمية و نقدر نحب بجد و نتواصل و نتفهم و نتعامل مع مشاعر الآخر بشكل عميق.
فقد يبدو أتنين مرتبطين أو متجوزين أنهم منسجمين مش عشان هما علاقتهم فعلاً كويسة ممكن فقط لأنهم الأتنين على شاطئ آخرهم يرشوا بعض بالمياه و معندهمش الجراءة للحب الحقيقى و الحميمية (و أنسجام الشئ لا يدل على صلاحيته فقد ينسجم شئ فاسد مع شئ فاسد و تكون علاقتهم فاسدة و لكن منسجمة)
و أتنين ممكن تعساء لأن واحد على الشط بيحس بالخنقة من غوص الآخر و واحد بيغوص و تعب من سطحية الآخر و أنه معندهوش جراءة يتعمق فى الحب الحقيقى و التواصل و التفهم و الحميمية.
فالفكرة هنا أن كل لما كان الأتنين على نفس مستوى العمق كانوا أكثر أنسجاماً.
و كل لما الإنسان بيقدر يتعمق بيحتاج شخص بيقدر يتعمق بنفس العمق او عنده الأستعداد يتعمق معاه.
أن فى أشخاص ممكن تنفصل عن علاقة لأن كان كل شخص فى عمق غير الآخر.
يعنى ممكن اللى على الشط ينفصل عن اللى بيغوص عشان مش قادر يغوص فى الحميمية مستوى أعلى من قدرته و مرحلته الحالية و يروح يرتبط بشخص زيه على الشاطئ
و بغض النظر عن كل دة أوعى أنت تعيش و تموت على الشط بغض النظر عن مين هيعوم أو بيعوم معاك لأن اللى بيرش المياه و بيلعب فى الرملة عمره ما هيحس و لا هيختبر جمال اللى بيغوص فى عمق و قلب البحر.
و خد بالك كل الناس بتقدر تقعد على الشاطئ و كتير بيسبحوا قريب من الشاطئ و قليل اللى بيسبح فى العمق و نادراً جداً اللى بيغوص.
#جرعة_من_جرعات_نور
#للأنوثة_وعلاج_العلاقات
