لو رديت على اللي بيأذيك .. مش هتتحول لعقدة ومشكلة

لو رديت مش هتتحول لعقدة ومشكلة ?‍♀️

أية اللي بتقوليه دا يا نور مش فاهمين!

يلا أمثلة ? توضح المعنى:

- تخيلوا "طفل" في المدرسة تم التنمر عليه،

ولد متنمر عيب على مناخيره وضحك عليها.

الولد لو سكت:ممكن يحس إنه قبيح وضعيف وثقته في نفسه هتتهز.

لو رد: وقاله طيب ما تبص على نفسك الأول.

هيحس بالقوة والقدرة وإنه قادر ياخد حقه.

مثال تاني ?

- أنثى جوزها بينتقدها من أجل الأنتقاد طول الوقت.

الأنثى سكتت: هتحس أنها مكبوتة وقليلة ومش كفاية.

لو ردت: أنا بحب نفسي كدا، عادي أني أغلط ما كلنا بنغلط.

هتحس أنها مش ضعيفة وضحية الزوج المعتدي، واللي ممكن تطلق عليه "نرجسي".

مثال تالت وآخير عشان الفكرة كدا أكيد وصلت ?

- راجل مراته بتقارنه دائمًا بغيره وتقوله بص فلان بيعمل أية مش زيك.

لو سكت: هيحس إنه قليل وضعيف وإنه عاجز.

لو رد: روحي أتجوزي اللي بتقارنيني بي لو عجبك، أو خليكي الأول ست زي  مراته.

هيحس إنه مش مكبوت والراجل المغلوب على أمره.

قصدك يا نور نهزق اللي بيهزقنا، طيب ما كدا هتبقى حرب!

لا مش تهزيق، رد اعتبار لنفسك.

حس إن جيبت حقك لنفسك، وإنك قادر ترد، وعارف تتعامل مع أي اعتداء أو قلة زوق أو تعامل سخيف.

طيب يا نور فين السلام الداخلي؟

هيجي بعد فترة، بعد ما تتأكد إنك قادر ومش ضعيف.

ولحظتها تقرر هل أنا قادر  على الرد بس هختار  السلام ولالا؟

يعني هتمشي بمبدأ "العين بالعين" لحد ما تكون متأكد إنك عارف اطلع عين اللي قدامك.

لحد ما توصل لمرحلة أعلى وأرقى "وإذا خاطبهم الجاهلون قالوا سلاما ".

بس مش هتقدر توصل للمرحلة الأرقى، غير لما تمر بمرحلة أدنى أنت متأكد أنك تقدر ترد.

بس بكامل اختيارك قررت "مش هرد، مش هتفاعل" لأني بختار السلام لوجه الله.

فرُد حتى يأتي اليوم اللي تكون فيه بقوة ووعي  "عدم الرد في حد ذاتها قوة ورد قوى وقادر تدفع بالحسنة السيئة".

#جرعة_من_جرعات_نور

#للأنوثة_وعلاج_العلاقات