عقلك هيشاور على شريك .. على أنه خطر!
عقلك هيشاور على شريك حياتك، على إنه خطر ⚠️
وهيقولك "أهجم عليه أو أهرب منه أو أثبت مكانك".
ودا اللي بيحصل مننا بشكل تلقائي،
لما شريك حياتنا يصدر منه "سلوك" عقلنا بيترجمه إنه "خطر".
أحب أوضح بمثال :D
دالوقتي ياسمين وشادي قاعدين في كافيه ومبسوطين،
وبيشربوا مشروب زي أي أتنين، بس شادي وهو بيشرب المشروب عدت جنبه بنت حلوة أوي،
شادي بالصدفة "هنعتبرها بالصدفة" عينه جت على البنت غصبًا عنه.
ومن حسن حظه "ياسمين" شفته.
ياسمين بدأ الدم يجري في عروقها ومبقتش شايفه قدامها من كتر الغضب "لأن سلوك شادي يمثل لعقل ياسمين خطر ⚠️".
راحت ياسمين أتحولت في لحظتها وبدأت تتخانق مع شادي.
اللي بدأ يلمح بشكل غير واعي ملامح الغضب على وش ياسمين وبدأ يتحفز هو كمان.
"لأن سلوك ياسمين يمثل لعقل شادي خطر ⚠️".
فياسمين طلعت القديم والجديد على شادي "هجوم".
وشادي قرر إنه يروحوا عشان عايز يبعد عنها دالوقتي "هروب".
بغض النظر عن مشكلة "ياسمين وشادي".
الفكرة إن العقل هنا مش بيفرق بين "حبيب" و"عدو".
هو أول ما بيشعر بالخطر من أقل حاجة وقد تبدو تافهة،
ولكن الشخص عنده في "ملف الخطر" هيبدأ يتعامل مع الآخر على إنه "خطر ⚠️".
ملف الخطر دا بقى قد يكون عند شخص "خناقة" شخص آخر "خيانة" شخص آخر "هتساب" شخص آخر "هترفض"...
الملف دا بيختلف من شخص لآخر على حسب،
معتقداته وأفكاره اللي أترسخت جواه بسبب "تجارب وخبرات سابقة".
وكل دا طبعًا بسبب نظام الحماية الطبيعي الموجود في عقلنا،
والمسؤول عنه منطقة في المخ "اللوزة المخية Amygdala" اللي بتلقط الخطر، وبيساهم معاها مناطق آخرى بس مش عايزة أحوله لبوست معقد فهنكتفي بمشاركة اللوزة :D
المهم الكلام دا نستفاد منه إن لما عقلك هيصور لك "حبيبك" على إنه "عدو"،
وفي الغالب ممكن تكتشف بعد ما تهدى وترجع تفكر بشكل منطقي إنك كنت مبالغ فيك جدًا.
الفكرة إن وعينا "بملف الخطر" بتاعنا هو الأساس،
ومش بس الوعي بالملف دا، لا كمان تدريجيًا نبدأ نتعامل معاه ونتصالح معاه.
لأن طول ما ملف الخطر مليان، كل لما لحظات حبيبك هيكون عدوك وخطر هتكون أكتر.
كل لما كنا في "سلام" مع ملف الخطر اللي جوانا، كل لما مشاكلنا قلت في علاقتنا.
والموضوع دا مش بس في "العلاقات العاطفية" لكن بينطبق على جميع العلاقات.
فأحظر مش دائمًا هجامتنا بتكون في محلها،
أحيانًا بيكون إنذار خطر مزيف من "اللوزة" :D
#جرعة_من_جرعات_نور
#للأنوثة_وعلاج_العلاقات
