كيف تتعامل مع شخص يقلل من قيمتك
هو هينفع ده صايع قاعد على القهوة طول الليل مع صحابه، هي دي هتعرف تفتح بيت ده مبتعرفش تطبخ أكلة، هو ده اللي هيرفع اسم العيلة ده عيل تافه، مين ده اللي يشيل كل الشغل ده لوحده ده عايز اللي يشيله، أقول كمان ولا كفاية لحد كده!
مين فينا على الأقل مسمعش جملة من دول واتكسف ومعرفش يرد يقول ايه، على الرغم من إن الجمل دي تبان عادية وهزار بس في الحقيقة الجمل دي فيها تقليل من قيمة الشخص سواء كان بقصد أو من غير قصد، والجمل دي بتأثر علينا بشكل سلبي كبير لأنها بتوصلنا إحساس أننا مش كفاية مش قد المسؤولية والثقة، وده بردو بيأثر على ثقتنا بنفسنا.
قيمتك في نظرتك لنفسك
قيمتك من خلال احترامك لنفسك وثقتك فيها لازم تبقى طالعة من جواك، مينفعش أنك تبقى عايز الناس تثق فيك وأنت مش واثق في نفسك، مهم أنك تبقى عارف إن أنت تستحق الاحترام والتقدير في المعاملة بغض النظر عن أسلوب الشخص التاني في التعامل معاك، عشان كده مهم تحط لنفسك شوية قواعد في التعامل مع الناس وتعرّف اللي بيتعامل معاك أنه مش مسموح بأنه يتجاوز حدوده معاك تحت أي ظرف.
إزاي تعرف الناس اللي بتقلل من قيمتك؟
بطبيعة حياتنا وعلاقتنا والناس اللي حوالينا باختلاف شخصيتهم والمواقف اللي بنتعرض لها ورد فعلنا عليها، كان ضروري أنك تعرف تميز الناس اللي بتقلل من قيمتك عشان تعرف تتعامل معاهم و هتساعدك أكتر جرعة نور.
في الشغل
بعض الموظفين وخصوصا لو لسه جداد بيتعرضوا للإهانة من الموظفين الأقدم أو أصحاب الشغل، مثلا يوصلك إحساس أنك مش فاهم حاجة وأنك لازم تسمع كلامه لأنه صح، أو تشتغل في مكانة أقل من مكانتك اللي تستحقها بحجة أنك مش مؤهل لسه للمكانة دي.
في الزواج
بعد الشهور الأولى للجواز والتعود على بعض بيحصل نوع من الروتين والمشاكل اللي بيستخدم فيها نوع من النقد والتقليل من الطرف التاني ومن الحاجات اللي بيعملها وبيقدمها، أو بحجة أن الشخص ده عنده خبرة أكتر من الطرف التاني عشان كده بيكون سياق الكلام في أوقات كتير تقليل من قيمة الشخص عشان يتأثر وينفذ الحاجة اللي الشخص ده عايزها منه.
في الأسرة
ديما الأهل عايزين يشوفوا عيالهم أحسن الناس، عشان كده ممكن يحفزوهم بس بشكل مش صح من خلال المقارنة بينهم وبين قريبهم اللي هو شوف ابن خالتك جاب كام وأنت جبت كام، جو المقارنة ده في تقليل من قيمتهم وثقتهم في نفسهم وإن أهلهم شايفين الشخص ده أفضل منهم.
كيف تتعامل مع شخص يقلل من قيمتك؟
الناس اللي بتحاول تقلل من قيمتك معظمهم من الناس اللي حواليك بشكل يومي أصحابك أو أهلك أو مديرك في الشغل، عشان كده ضروري تعرف إزاي تتصرف بالشكل الصح في المواقف دي:
خليك هادي: ممكن الشخص ده بيستفزك عشان يضايقك أو بيحاول يقلل من قيمتك، في الحالة دي مهم إن أعصابك تكون في التلاجة بمعنى أنك مش مهتم بالكلام اللي بيقوله لأنك عارف نفسك كويس ومش محتاج رأي حد فيك.
الرد بشكل مناسب: في ناس لما مش بترد عليهم بتفتكر ده ضعف منك فبتزيد في قلة ذوقها، في الحالة دي مهم أنك ترد عليهم بشكل محترم وصارم في نفس الوقت عشان تعرف تحافظ على صورتك قدام نفسك قبل الناس اللي حواليك.
متخليش فرصة لحد عشان يقلل منك من خلال أنك تعمل المطلوب منك على أكمل وجه.
شتت انتباه الشخص اللي بيقلل من قيمتك بمعنى أنك تقلب الترابيزة عليه، أسأله عرف يحل مشكلته ولا لا؟ ايه أخبار شغله؟ قلب الأدوار بينكم ده بيلغبطه لأنه هيحتاج يفكر قبل ما يرد على أسئلتك.
ورشة جرعة قبول
الخوف من الرفض يمنعك أنك تحصل على ما تريد بسبب خوفك من احتمالية الرفض ! ممكن يكون شخص معجب بيك جدًا لكن خوفك للرفض بيمنعك تخوض التجربة فبيأثر بطريقة غير مباشرة بأن يحدث الرفض فعلاً ! أو حتى بيمنعك من الشعور بالقبول من الناس المحيطة. بل الشعور بالرفض بيجذب لك المزيد من الرفض. الورشة متاح فيها تمرينات عملية ستساعدك على الموصول لوعي جديد لمشاعر القبول والرفض. وبعدها ستكون مستعد لاستقبال القبول من المحيطين. اشترك الآن بالورشة.
حاجات متعملهاش مع الشخص اللي بيقلل من قيمتك
مش سهل علينا أن حد يقلل من قيمتنا قدام نفسنا واللي حوالينا، بس في حاجات مهم أنك تراعيها وأنت بتتعامل مع الشخص اللي بيقلل من قيمتك:
متبينش أنك متضايق: الشخص اللي بيقلل من قيمتك هدفه أنه يضايقك ويقلقك، عشان كده مهم أنك تمسك أعصابك ومتردش عليه، ده هيحفظلك كرامتك وصورتك قدام الناس.
متتأثرش بكلامه عنك: أنت عارف قيمة نفسك فكلام الشخص ده عنك مش هيفرق لك في حاجة، حافظ على وضع الاستقرار بتاعك ومتشغلش بالك بكلامه.
متبررش لحد حاجة إلا في حالتين:
أنك غلطان ومحتاج تصلح وجهة نظر الشخص عنك.
الشخص اللي بتبررله مهم بالنسبالك.
متخدش الأمور بشكل شخصي، لأن الشخص اللي بيقلل من قيمتك ممكن يكون عنده شعور بقلة القيمة بيعوضها من خلال أنه يقلل من الناس اللي حواليه عشان ساعتها بيوصله إحساس أنه أجمد واحد في الدنيا.
ومهم أنك تعرف أن قيمتك لنفسك بتكون من جواك وأنك مش مستني حد عشان يثبتلك ده، وكمان مهم جدا وأنت بتتعامل مع الناس تكون موضح لهم حدودك وأنه مش مسموح بتجاوز الحدود دي.
أسئلة شائعة
كيف تؤدب شخص يقلّل من قيمتك؟
عليك تغيير محيطك، وتطرد من يحاول التقليل من قيمتك من حياتك نهائياً.
كيف تجعل شخص يعرف قيمتك؟
لازم تعرف إنك تستاهل الحب وتستحق الاحترام في الحياة، ولازم تعرف أنت قيمة نفسك أولاً، لأن الناس بتشوفك زي ما بتشوف نفسك.
